නයා මාරුවීම - කෙටි කතාව

“ඕන් අද ඉඳල තමයි හරියටම පැන්ෂන් ගියා කියල කියන්න පුළුවන්, අන්තිම බැඳීමත් ගියා” රතු සහ කළු පැහැ කොටු සරමක් කැහැපට ගසාගෙන උඩුකය නිරාවරණය කරගෙන සිටි අමරසිංහ මහතා තම කළු මහත බඩ දකුණතින් පිරිමදින ගමන්, අසල සිටි තම බිරිඳට කීවේය.  ඇයට තරහ ගියේ ඔහුගේ ප්‍රකාශයට නොව ඔහු එය කියනවිට මුහුණේ ඇතිවූ පණ්ඩිත සිනහවටය.

එහෙත් ඇයට නම් ඒ පිළිබඳව, ඔහුට තරම් සතුටක් ඇති බවක් ඇගේ මුහුණින් නම් පිළිඹිබු වුයේ නැත. ඇය පැහැපත්ය. සිහින් සිරුරකින් හෙබිවිය. ඔහුට වඩා බොහෝ තරුණ බව පෙනුනද, ඇත්තෙන්ම ඔහුට මාස 5 කින් වැඩිමල් විය. රජයේ සාත්තු සේවිකාවක් ලෙස සේවයට බැඳුනු ඇය විශ්‍රාම යනවිට ප්‍රධාන මෙට්‍රන් වරියක වූ ඇය ඔහුට වැඩිමල් නිසා මාස කිහිපයකට කලින් විශ්‍රාම ගන්නට සිදුවුවත් ඇය එය කාටවත් නොදැනෙන්නට කරගත්තාය.

“එයාට මාස හයක් ඇමතිතුමා වැඩකරන්ට කියල තියෙනවා”, ඇය තම ස්වාමියාට පෙර විශ්‍රාම ගැනීම පිළිබඳව රෝහලේදී අසන්නට තරම් එඩිතර වුවන්ට කීවාය.

ඔවුන් දෙදෙනා මිදුලට වී බලාසිටියේ ඔහුට මෙතෙක් කලක් රජයෙන් දී තිබු රාජකාරි වාහනය, තම නිවසින් පිටවී යන ආකාරයය. විශ්‍රාම ගෙන මාස තුනක් ඉදිරියටත් රාජකාරී වාහනය පාවිච්චි කිරීමට අයිතිය දී තිබුන නිසා, නිවසේ තබාගෙන තිබු වාහනය අද නිවසින් පිටව යන්නේ අවසාන වතාවටය. සැමදේම බොහෝ සැහැල්ලුවෙන් ගන්නා සමරසිංහට නම් මෙය එතරම් ප්‍රශ්නයක් නොවීය.

“අපි ඉතින් එතරම් ගමන් යන එකක්යැයි, අනික දැන් හැමතැනම ත්‍රිවිලර් තියෙනවානේ” බිරිඳ මේ පිළිබඳව මතක් කල විට ඔහු කීවේය. වාහනය ගෙදර නැතිවීමේ පාඩුව වැඩිපුර දැනෙන්නේ තමනට බව බිරිඳ දැන සිටියාය. එහෙත් ඈ කිසිවක් කියන්නට ගියේ නැත. නැවතත් අහන්නට වෙන්නේ එම පිළිතුරම බව ඇය දැන සිටියාය.

පළාත් ලේකම් වරයෙකුව කාලයක් සේවය කළ සමරසිංහ මහතාට, එක්වරම කිසි දෙයක් නොකර ගෙදරට වී සිටීමට පුරුදු වීම පහසු නොවන බව, ඔහුගේ සේවයේ අවසාන කාලයේ, පවුලේ සියලු දෙන සිතූහ. කතා කළහ. එහෙත් ඔහු විශ්‍රාමික ජීවිතය බාරගත්තේ වැරදීමෙන් අසුවූ මාළුවකු වතුරට දැමුවිට නැවත ඊ ගසක් මෙන්   වතුර ඇතුලට පිහිනා යනවාක් මෙන්ය. ඔහු අක්කරයක් පමණ වූ තම මවගෙන් ලැබුණු උද්‍යානය පුරා පලතුරු වවන්නට පටන්ගත්තේය. නිවසේ උතුරු පැත්තට වන්නට තිබුණු කැලෑව සුද්ධකර, ඊසානදිග පැත්තට තිබු කිසිම දෙයක් වැවෙන්නේ නැති බෑවුම පුරවන්නට පටන් ගත්තේය. එය පිරෙනවිට අසල වලවල් හාරා දිරන රොඩු මතට පස් තට්ටුවක් දැම්මේය. නිවෙස අසල නිවසක ජීවත් වෙන දුරින් නෑයකු වන කෘෂිකර්මේ වැඩකරන ලිපිකරුවෙකුට කියා පලතුරු පැල ගෙන්වා ගත්තේය.

“තව අවුරුද්දක් දෙකක් ඔහොම ගෙනල්ල දෙයි, පැන්ෂන් ගිය අලුත නිසා, ඊට පස්සේ මඟහරි මොනවා හරි කියලා, බලන්න මම කිව්වේ නැද්ද කියලා” පැල දුටුවිට බිරිඳ කීවාය.

“මම දන්නවා, මම දන්නවා,” සමරසිංහ මහතා කීවේ සිනාසෙමිනි. ඒ කියලා මේකත් ගෙන්න ගන්නේ නැතුව ඉන්ටද? 3 ක් නෙවෙයි මිනිහ අවුරුදු 5 ක් විතර කරයි, මම ළමයෙකුත් ඒ කාලේ ඉස්කෝලෙට දාගන්ට ප්‍රින්සිපල් කෙනෙකුට කතාකරා”

“ඒ වුනාට ස්ටාෆ් එකට නෝනා නම් කියල තිබ්බේ ගානක් දීල දාගත්ත කියලා” බිරිඳ කියද්දීම ඔහු හෙමිහිට නිවස ඇතුලට ගියේ, හවස ඇවිදින්නට යාමට ඇඳ ගැනීමටය.

ඔහු හවසට ඇවිදින්නට පටන් ගත්තේ විශ්‍රාම ගන්නට අවුරුදු දෙකකට පෙර සිටය. ඒ ඔහුගේ රුධිර පීඩනය වැඩි බව වෛද්‍යවරයා කී පසුය. කිහිප වරක් විවිධ ක්‍රමවලට හවසට ඇවිදීමේ පුරුද්ද පටන් ගන්නට උත්සාහ කර, අවසානයේ කාර්යාලයට යනවිට ඇඳුමක් රැගෙන ගොස් කාර්යාලය අවසානයේ මාරුකර, මධ්‍යම මහා විද්‍යාලයේ ක්‍රීඩා පිටියට ගොස් එහි රවුන් 10 ක් ඇවිදීම, ඔහු වැඩ කරන දිනවල දිනපතා පුරුද්දක් කර ගත්තේය.

විශ්‍රාම ගත් පසු ඔහු ගමේ පාරවල් වල ඇවිදින්නට පටන් ගත්තේය. උපන් ගෙහිම පාරවල මෙලෙස ඇවිදීම මුලදී තරමක සබකෝලයක් දැනුනද, දවස් කිහිපයකින් එය නැතිව ගියේය. ඔහුව දන්නා පිරිස්; නොදන්නා අයට වඩා දන්නා අය ඔහුට පාරේදී  මුණගැසුණි, ඔහුට යමක් කීවහ, සිනාසුනහ. එසේත් නැත්නම් ගෞරවයට වාගේ එසේ අවශ්‍යතාවයක් නැතත්, පාරේ ඔහුට ඉඩ දුන්හ.

මෙලෙස මහපාරේ ඇවිදීමේදී ප්‍රශ්න කිහිපයක් විටින්විට ඇතිවුනි. ලොකුම කරදරය ත්‍රි විලර්ය. ඒ ඉදිරියෙන් එන ඒවාගෙන් නොවේ, පසුපසින් එන ඒවාගෙන්ය. සමහර ඒවා ඔහුගේ පසුපසින් පැමිණෙනවා ඔහුට ඇසෙයි. ඔහුට හැරී බලන්නට සිතුනත්, එසේ බැලීමට නම් නැවතිය යුතුය, එලෙස නැවතී නැවතී ත්‍රි වීලර් වලට ඉඩ දෙන්නට ගියහොත්, විනාඩි දහයකට පස් වතාවක් වත් නවතින්නට සිදුවිය හැකි බව ඔහු ගණනය කළේය.

අනෙක් ප්‍රශ්නය ඇතිවුයේ වැසි කාලයටය. යල කන්නය කාලයට වැඩියෙන්ම ඒ පැත්තට වහින්නේ හවස් කාලයටය. නිවසින් පිටවන වෙලාවට වහින්නේ නම් නොයා ඉන්නට පිළිවන. එහෙත් අතරමඟදී වැස්ස පටන් ගතහොත් කොහේ හරි කඩයක හෝ නිවසක් අසල අගුවක නැවතී සිටින්නට සිදුවේ. එය නිවසක් වුවේ නම් නිවැසියන් ඔහුට ඇතුලට කතාකරන අවස්ථාද ඇතිවේ. ඔහු එවැනි අනවශ්‍ය සතුටු සාමිචි වලට  කැමති වුයේ නැත. සාමාන්‍ය ජීවිතයේ පවා තමන් තරමක් දුරට හෝ අන්තර්වර්තිකයෙකුද යන ප්‍රශ්නය ඔහුගේ සිතට නැගුනු වාර අනන්තය.

ත්‍රි විලර් ප්‍රශ්නයට පිළිතුරක් ලෙස, ඔහු වාහන එතරම් නොමැති කුඩා කොන්ක්‍රීට් පාරක් සොයා ගත්තේය. එහෙත් ඒ පාරේ අතරමග ගෙවල් කිහිපයක බල්ලන් ඔහු දුටුවිට බුරාගෙන ඔහු වෙත එන්නට වූ නිසා, ඔහුට දවස් කිහිපයකින්ම ඒ පාරත් එපාවිය. වෙනත් මිනිසුන් යද්දී අහක බලාගෙන සිටින බල්ලන් ඔහු දුටුවිට රංචු ගැසී බුරන්නට පටන් ගනියි. මෙයට පිලියමක් ලෙස ඔහු පාරේ මුල හරියේදී කවුරුත් නොමැති වෙලාවක අඩි 3 ක පමණ වැටහිරියා ලී කෑල්ලක් කඩා ගත්තේය. එය කාටවත් වැඩිය නොපෙනෙන්නට අත දිගේ තබාගෙන බල්ලන් ලඟට පැමිණියහොත් බය කිරීමට සිතාගෙන බල්ලන් නොදැක්ක සේ ඇවිද්දේය.

“වේලුනු ලීයකින් කෝටුවක් හදාගෙන ඒක හංගාගෙන යන්න බොටම් එක දිගේ පොඩි මැහුමක් නන්දාට කියල මහගන්න ඕනෑ” ඔහු සිතුවේය.

බල්ලන යම් විදිහකින් කොටුව දැක්කා වියයුතුය. ඔවුහු හයිනාස් රැලක් මෙන් ඉතාමත් ආක්‍රමණකාරී ලෙස ඔහු වෙතට පැමිණෙන්නට පටන් ගත්හ. ඔහු අවසානයේදී කෝටුව එළියට ගෙන බල්ලන්ගෙන් බේරීමට හැකි වුවද, ඒ වතාව එම පාරේ ඇවිදින්නට ගිය අවසාන දිනය විය.

පසුදින උදේ වරුවේ වත්ත පිරිසිදු කරමින් සිටිනවිට, ඔහුට දෙයියෝ දුන්නා වැනි අදහසක් ඔලුවට ආවේ, එවැනි අදහසක් සිතේ කොනකවත් නැති වෙලාවකය. ඒ තමන්ගේම ඉඩම වටා ඇවිදින්නට කුඩා අඩි පාරක් තනා ගැනීමය.  සමරසිංහ මහතා එකෙනෙහිම වැඩට බැස්සේය. අලුත් අදහසක් ආවිට එසැනින් ක්‍රියාත්මක වුයේ නැත්නම් අදහස අමතකවීමට ඉඩ තිබේ. හොඳ අදහස් සියයකින් අනුවක්ම අමතක වෙයි. ඒ සියල්ල අමතක නොකර ක්‍රියාත්මක කලානම් මෙලහකටත් ලෝකය සුරපුරක් වීමට ඉඩ තිබුනේ යයි ඔහු නිතරම සිතන්නේය.

නිවසට නිරිතදිගින් අඩි තිහක් බැස්මකින් (උස උණ බම්බුවක් එතන සිට ඔසවා මිදුල උසට ලකුණු කරගෙන මැනීමෙන් මෙය මැනගත්තේ පසුවය.) තිබෙන ගේට්ටුවේ සිට කන්දේ නිවාස අසලට පැමිණ, ඉන්පසු තවත් අඩි තිහක නැග්මකින් කන්ද කෙලවර වන ඉඩමේ නැගෙනහිර කෙලවරට ඉඩමේ අයින දිගේ ඔහු කුඩා අඩිපාරක් නිර්මාණය කළේය. ඉන්පසු ඒ අඩිපාර ඉඩමේ අනෙක් පැත්තෙන් රවුමෙන් බැසයන්නට හැදුවේය. ඒ පැත්තේ එක්වරම බැස්මක් තිබුන නිසා පඩි කිහිපයක් ද කපන්නට සිදුවිය.

දවස් දෙකකින් ඇවිදින මාවතේ වැඩකටයුතු නිමාවිය. නිවසේ ටයිල් මත ඇවිද තම පියවරක දිග ආදී 2 ක් බව (පියවර 8 කින් ටයිල් 16 ක් පසුකරන්නට හැකි බව ඔහු නිරීක්ෂණය කළේය) ගණනය කරගත් ඔහු, ඔහුගේ අඩිපාරේ දිග මීටර් 300 ක් බව දැක්කේය; දිනකට 10 ක් ඇවිද්දොත් කිලෝ මීටර 3 කි. ප්‍රමාණවත්ය. සෑම රවුමකටම සිරස් අතට අඩි  60 ක් ඉහලටද නගියි. 10 ක් ගියවිට අඩි 600 ක් වෙයි. ඒ කියන්නේ 10 ක් ගියවිට දවසකට වරක් සීගිරිය නැංගා හා සමාන වෙයි.

මේ ක්‍රමය මහපාරේ ඇවිදිනවාට වඩා හැම අතින්ම ප්‍රයෝජනවත්ය. නිස්කලංකය, අනතුරු දස දහස් ගුණයකින් අඩුය, ඒකාකාරී නැග්මක් ඇත, වායු දුෂණය අවමය, ත්‍රිවිල් අනතුර ඇත්තෙම නැත, වැස්සක් ආවොත් විනාඩියෙන් ගෙදරය, කොයි පැත්තෙන් බැලුවත් හොඳක් මිස වැරද්දක් නම් පෙනෙන්නට නැත. අනෙක් අතින් සීගිරිය හා සම්බන්ධය සිතට නැඟෙන හැමවිටම සාමාන්‍යයෙන් යාන්ත්‍රික මාදිලි ආයාසයකින් කලයුතු ක්‍රියාකාරකමක් වන ඇවිදීමට අලංකාරයක්ද එකතු කළේය.

  සමරසිංහ මහතාගේ හවස ඇවිදීමේ කතාවේ මෙතැන් පටන් කතාව ඔහුගේ බිරිඳ පමණක් දනී.

ඔහු ඇවිදින්නට පාර සුද්ද කරනවිට, වත්තේ නැගෙනහිරට වන්නට කෙලවරේ ගොරක ගෙඩි විශාල ප්‍රමාණයක් බිමට වැටි ගොඩගැසී තිබෙනු දුටුවේය. ඒ ගොඩේ අවුරුදු ගණනාවක් තුල වැටුණු ගොරකා ඔහු දුටු අතර සමහරක් ඒවා පැල වී ද තිබුණු බව ඔහු දුටුවේ ඒවා උදුලු ගෑමෙන් පසුවය. කිහිපයක් යකෙකුගේ ඇස් මෙන් දිලිසෙමින් තිබුණි.

“අපරාදේ පැල ටික, කලින් දැක්ක නම් හෙමිට ගලවගන්න තිබුනා” ඔහු සිතුවේය.

මෙම ගෙඩි වැටි තිබුනේ අල්ලපු වත්තේ තිබුනු විශාල ගොරක ගසකිනි. පසුදින ඔහු මේ අඩිපාරේ ඇවිදින්නට පටන්ගත් විට, පළමු රවුමේදීම ඔහු අලුතින් වැටුණු රතුපාට ගොරක ගෙඩි කිහිපයක් නිරීක්ෂණය කළේය. ඒවා නොපෑගෙන ලෙස ඇවිද්දේය. තුන්වෙනි රවුම යනවිට ඔහුට එකක් අහුලාගන්නට සිතුනි. ඔහු අල්ලපු වත්ත දෙස එතරම් උවමනාවක් නොමැති ලෙස එහෙත් බොහෝ තියුණු ඇසින්, කවුරුත් සිටිනවාදැයි බලා ලඟින් තිබුණු කුඩා එහෙත් හොඳින් ඉදුණු ගෙඩිය අහුලාගෙන සාක්කුවට දමා ගත්තේය.

කලිසමේ සාක්කුවේ චප්ප වේ යයි බියෙන් එය අනික් රවුම යාමට පෙර ගෙදර වැරෑන්ඩා වේ කොට බැම්ම උඩ තැබුවේය. මෙය ඔහු නිතරම බිරිඳ ගෙන් බැනුම් අහන ක්‍රියාවක් වුවද ඔහුට එය පුරුද්දකට ගොසිනි. උද්‍යානයේ වැඩ වලට යොදාගන්න උපකරණ අඩුතරමින් 5 ක් වත් දිනකට තමන්ට ඒ බැම්ම මතින් හවසට ඉවත් කරන්නට සිදුවන බව, වරක් බිරිඳ කීවා ඔහුට මතකය.

පසුදින උදයේ ඔහු බිරිඳට මෙම ගොරක ගෙඩි පිළිබඳව කිව්වේය. ඇය එතන බලන්නට ගොස් තවත් ගෙඩි 5 ක් පමණ ඇහිඳ ගෙන ආවාය. පෙරදින  සමරසිංහ මහතා ඇහිඳගෙන ආ ගෙඩියද සමග බික් ගලවා වට්ටියක වේලෙන්නට දැමුවාය.

දැන් දවසින් දවස එතනට වැටුණු ගොරක ගෙඩි දෙදෙනාම අහුලාගෙන පැමිණියහ. එය තරමක තරඟයක් බවටද පත්විය. ලොකු ගෙඩියක් හෝ අමුතු විදිහක ගෙඩියක් තමන්ට හමුවුනොත්, එය අනිකාට පෙන්වන්නටද ඒ පිළිබඳව සාකච්ඡා කරන්නටද ඔවුහු උත්සුක වුහ. ඔහු ගොරක පිළිබඳව ගූගල් වෙත ගොස් බොහෝ දෑ ගෙනගත් අතර, එසේ නොකරන බිරිඳ මෙතරම් ගොරක ගැන දැනුවත් කෙලෙසදැයි ඔහු කල්පනා කළේය. ඒ ඇය කුඩාකල ඇගේ නිවසෙහි වත්තේ තිබු විශාල ගොරක ගසක් නිසාවෙ යැයි ඔහුට කතාබහෙන් දැනගන්නට ලැබිණ.

මේ අතර ගොරක ගහ තිබුණු ඉඩමේ ඒ අසල නිවසේ ජීවත්වූ වයසක යුවලට,  මෙලෙස පහලින් ගෙදර යුවල තමන්ගේ ගොරක ගසින් වැටෙන ගෙඩි අහුලා ගන්නා බවට සැකයක්  ඇතිවන්නට පටන් ගත්තේය. මෙවැනි දෙයක් සිදුවනවිට කෙනෙකුට  සුවඳකින් හෙමින් පැතිරෙන්නාක් මෙන් දැනෙන ඔවුන්ගේ සැකය එන්ට එන්ටම වැඩිවිය. අග හැත්තැවේ පමණ වයස් වූ මෙම ජෝඩුවට ළමයින් හිටියේ නැත. අක්කරයක් පමණ වූ එම ඉඩමේ තිබු පොල් විකිණීමෙන් ජීවත්වූ අතර, අවුරුදු කිහිපයකට වරක් මේරු ගහක් දෙකක් විකිණීමෙන් බැංකුවේ දාගන්නට කීයක් හරි අතට ලැබිණ.

ටිකදවසක් යනවිට තමන්ගේ වැට අයිනේ තිබෙන ගොරක ගසේ ගෙඩි අල්ලපු ගෙදරින් අහුලගන්න බව වයසක ජෝඩුවට සාක්ෂාත් විය. මෙතෙක් කලක් වැටෙන් එහාට ගොස් ඒ පැත්තට වැටෙන ගෙඩි අහුලා ගත්තේ නැති නමුදු, මෙලෙස තමන්ගේ ගහෙන් වැටෙන් ගොරක ගෙඩි අල්ලපු ගෙදරින් අහුලා ගැනීම නැවත්වීමට කුමක් කලයුතු යැයි, ඔවුන් නිතර කතා කළහ. අවසානයේ කාන්තාව වැට කණුවක් මෑත් කර ඒ පැත්තට ගොස් වැටෙන ගොරක ටික අහුලා ගැනීමට තීරණය කළහ.

“මම ගියොත් හොඳ නැහැ, පිරිමියෙක් නේ, තමුන් ගියොත් ඒ අය දැක්කත් ගෑණු කෙනෙක් නේ, කලබල වෙන්නේ නැහැ” පිරිමියා තම අදහස ඉදිරිපත් කල අතර, කාන්තාව එයට විරුද්ධ කරුණු ගෙනහැර පාන්නට අපොහොසත් වුවාය.

දවසක් දෙකක් යනවිට සමරසිංහ යුවලට සිදුවන්නේ කුමක්දැයි වැටහින. “පුදුම මිනිස්සුනේ, මෙච්චර කාලයක් කුනුවෙන්ට ඇරලා තිබ්බ ගොරක අපි අහුලා ගන්නකොටමනේ ලෝබකම ඇවිල්ල තියෙන්නේ” බිරිඳ සැමියාට කිව්වාය. ඔවුනට ඉන්පසු දවසකට ගොරක ගෙඩියකට දෙකකට වඩා අහුලාගැනීමට නොහැකි විය.

දවස් කිහිපයක් මෙසේ ගත වනවිට සමරසිංහ මහතාට අපුරු අදහසක් මොලයට ආවේය. “ඔයාට නම් පුදුම දේවල් හිතට එන්නේ”  සමරසිංහ මහත්මිය ඔහු එම අදහස ඇයට පැහැදිලි කලවිට සිනාසුනාය.

අවුරුදු දෙකකට පමණ පෙර ඔහු චීනයට අධ්‍යයන සංචාරයක් සඳහා ගියේය. ඔහු එහිදී මිලදී ගත් නොයෙකුත් විසිතුරු භාණ්ඩ අතර හරියටම පන ඇති සර්පයෙකු ලෙස පෙනෙන රබර් නයෙකුද විය. සමරසිංහ මහත්මිය ඒ දෙස බලන්නට බිය නිසා, එය නිදන කාමරයේ ලාච්චු අටේ කබඩ් එකේ යටම ලාච්චුවේ තැන්පත් කර තිබිණ.

තිබු තැන අමතක වීම නිසා, කිහිප තැනක සොයා බැලීමෙන් පසුව රබර් නයා සොයා ගැනීමට හැකිවිය. සමරසිංහ මහතා ඇවිදින්නට යනවිට අවසාන රවුමේදී නයා ගොරක ගෙඩි වැටෙන හරියේ පඳුරකට පෙනෙන නොපෙනෙන ලෙස ස්ථානගත කෙරින.

මෙම ස්ථානගත කිරීමෙන් හරියටම දවස් තුනකට පසුව, ගොරක ගෙඩි පෙර පරිදිම කවුරුත් අහුලාගන්නේ නැතිව ඉතිරිවන්නට පටන් ගත්තේය. සමරසිංහ ජෝඩුව නැවත තරඟයට තම ඉඩමේ තිබු ගොරක ගෙඩි අහුලා ගෙන එන්නට පටන්ගත්හ.

එක්  සවසක  සමරසිංහ මහත්මිය කුඹුර පැත්තට වන්නට ඇල්ල මුදුනේ තිබු රෝස පැල වලට වතුර දමමින් සිටියාය. ඒ දිගට තිබු ලෙමන් පැල වලට  සමරසිංහ මහතාද ඒ පැල අතරින් තිබු රෝස පැල වලට මහත්මියද, පුරුද්දක් වශයෙන් ඉඩවර කාල වල පමණක් හවසට වතුර දැමුහ. මෝසම් වැසි කාලවල කෙසේ වත් වතුර නොදැමූ අතර, නියඟ කාලයේ එක වැස්සක් වැස්සොත් සතියක් පමණ වතුර නොදා ඉන්නට හැකි බව, ඔවුන් නිරීක්ෂණය කර තිබිණ.

 සමරසිංහ මහතා එදින ඇවිදින විට ගහ මුල එතරම් ගොරක ගෙඩි වැටි නොමැති බව දුටුවේය. වැටි තිබුණු ඉදුණු ගෙඩි දෙකම රබර් නයා ගේ පිටතට නිරාවරණය වී ඇති පිට කොටස අසලින්ම තිබෙනවා දැක, හෙමින් පාත්වී එම ගෙඩි දෙකම එකවර  අහුලාගෙන සාක්කුවට දමා ගන්නට යද්දී, එක ගෙඩියක් නැවත එතනටම වැටින. ඔහු එය අහුලාගන්නට නැවත අත දාන විටම රබර් නයා එක්වරම ආපසු හැරුනේය.  සමරසිංහ මහතාට කුමක් සිදුවුණු දැයි සිතා ගන්නටත් පෙරම අත දිගේ දරුණු වේදනාවක් ශරීරය පුරා පතුරුනි. ඔහුට වමනය වීමට යන බවක් දැනුනි. හුස්ම ගැනීමට අපහසු වෙද්දීම තම බිරිඳගේ නම කියා කෑ ගැසුවාය.

ගම්පොලින් ගෙනා රතු රෝස පැලයට වතුර දමා අවසන්වන විටම, සමරසිංහ මහත්මියට යමෙකු හයියෙන් කතා කරන්නට උත්සාහ කරන්නාක් වැනි සද්දයක් ඇසුනි. ඇය ටික වෙලාවක් කල්පනාවෙන් කන් දුන්නාය. නිතරම පාරෙන් සද්ද ඇසෙන නිසා, ඇය එය අමතක කර දමා මල් බාදියට වතුර එකක් පිරවීම පිණිස, වතුර දැමීම සඳහාම මිදුලේ සවිකර තිබු කරාමය වෙත ගියාය. එසේ යද්දී මේ වනවිට වත්ත වටේ රවුමක් යාමට තමන් පසුකර ගිය තම සැමියා මෙතනින් නැවත යාමට කාලය හරි නේදැයි ඇයට එක්වරම සිතුනි. බොහෝවිට අපට මෙලෙස එකිනෙකට සම්බන්ධ සිතිවිලි දෙකක් වරින්වර මනසට පැමිණියද, ඒ දෙක සම්බන්ධ කර යම් අපට වෙන්නට යන ලොකු කරදරයක් ගැන අනතුරු  ඇඟවීමක් සිතෙන් අපට දන්වයි. සමහර අවස්ථාවල එය අපට වැටහෙයි. සහරවිට අපට එය දැනෙන්නෙම නැත. නමුත් එදින   සමරසිංහ මහත්මියට එය දැනුනාය.

ඇය බාල්දිය බිම අතහැර අඩිපාර දිගේ වත්තේ උතුරු දිශාවට වේගයෙන් ඇවිද්දාය. අඩි කිහිපයකට පසු ඇය දුවන්නට පටන්ගත්තාය, තම සැමියා ගොරක ගහ අසල මුනින් අතට වැටි සිටිනු දුටුවාය. ඒ අසලට යනවිට තමන්ගේ රබර් නයා හෙමින් හෙමින් එහා වත්තට සේන්දු වන ආකාරය දුටුවාය. ඇය එතනම නැමී සැමියාගේ නාඩි බැලුවාය. ඇය තම සේවා කාලය තුල දහස් ගණනක් මිනිසුන්ගේ නාඩි බලා ඇත්තේය. තම සැමියා මියගොස් ඇති බව දැනගන්නට ඇයට වැඩිවෙලාවක් ගියේ නැත.

4 ඇමෙරිකානු මිලිටරි ගිවිසුම 4

මෙලෙස ඇමරිකානු රේඩාර් ශ්‍රී ලාංකික භූමියේ, ඔවුන්ගේ පිටුපස මිඳුලේ සවි කිරීම පිළිබඳව ඉන්දියානුවෝ විරෝධය පල කලහ. එය ඕනෑම කලාපීය බලවතෙකුගෙන් බලාපෙරොත්තු විය හැකි ස්වාභාවික ප්‍රතික්‍රියාවකි. මටත් තවත් නිලධාරියෙකුත්  නවදිල්ලි නුවර ඉන්දියානු නාවික හමුදා මූලස්ථානයට ගොස්, එහි නාවික හමුදාපති වරයා මුණ ගැසී මෙම ව්‍යාපෘතියෙන් ඉන්දියාවට තර්ජනයක් ඇති නොවන බවත්, අපට යුද්ධය අවසාන කර ගැනීම සදහා මෙම පද්ධතිය ඉතාමත් අවශ්‍ය බව පෙන්වා දී ඔවුන්ගේ බිය තරමක් දුරට හෝ පහ කරන්නට සිදු විය.  

ඉන්දියානු නාවික හමුදාපතිවරයා ඔහුගේ කාර්යාලයේදී මුණ ගැසී ඔහුට මේ පිළිබඳව පවර්පොයින්ට් ඉදිරිපත් කිරීමක් කල පසු ඉන්දියාවටද එක්සත් ජනපදය සැපයීමට සැලසුම් කරන  උපකරණ සැපයිය හැකි බවත් එම තාක්ෂනයන් ඔවුන් අතද ඇති බවත් පවසා සිටියේය. විශේෂයෙන්ම ඉන්දියාවේ බැංගලෝරයත් දැන් ඉලෙක්ට්‍රොනික් තාක්ෂණය ඉතාමත් ඉහල තලයක සිටින්නේ යැයි ඔහු කියා සිටියේය. එහෙත් මම එක්සත් ජනපදයෙන් ලබාදෙන උපකරණවල හැකියාවන් පෙන්වා දී එවැනි රේඩාර් යන්ත්‍ර  යනාදිය ඉන්දියාවේ නිපදවන්නේ නැති බව ඔහුට පැහැදිලි කර දුන්නෙමි.

ඔහු එයට අකමැත්තෙන් වුවද එකඟ විය. ඉන්පසු “මේ එක්සත් ජනපදයෙන් ලබාදන ව්‍යාපෘතියට අපට අකමැත්තෙන් හරි එකඟ විය හැකියි. එහෙත් කලාපයේ අපට විරුද්ධ රට වලින් ඔබ උදව් ලබා ගැනීමට පිළිබඳව නම් අපට කිසිසේත්ම එකඟ විය නොහැකියි.” යැයි ඔහු පැවසීය.

මුලින් අපට ඔහුට මෙය පැහැදිලි කිරීමට ලබා දුන් විනාඩි 10 ක කාලය අවසානයේ පැයකටත් වඩා දීර්ඝ විය. සාකච්ඡාව අවසානයේදී අපට මේ යුද්ධය සාර්ථකව අවසන් කර ගැනීම සඳහා ඔවුන් ගෙන් ලබාදිය හැකි යම් උදව්වක් තිබේදැයි ඔහු විමසීය.

අප  ඔහුට කලහැකි හොඳම උදව්ව අපට බලගතු යුධ නැවක් ලබාදීම බව කීවෙමු. එවිට ඔහු අප කිසිසේත් බලාපොරොත්තු නොවූ මේ ප්‍රකාශය කර සාකච්ඡාවට යම් මිත්‍රශීලී හාස්‍යයක් එකතු කලේය.

“මම ඔබට නැවක් දෙන්නම්. ඒ වෙනුවට මට ඔබේ වේග ප්‍රහාරක යාත්‍රා දෙකක් ලබාදිය හැකිද?” එකල අපගේ වේග ප්‍රහාරක යාත්‍රා වලට අසල් වැසි රටවල තිබූ ගෞරවයද මේ ප්‍රකාශයෙන් මනාව පිලිබිඹු විය.   

මේ සම්බන්ධව මා විසින් ඉන්දියානු නාවික හමුදාවේ විරෝධය සමතයකට පත් කිරීම හා ඇමරිකානුවන් ඉන්දියාවට ඇති ගෞරවය මූලික කරගෙන ඉන්දියානු විරෝධය නිසා, අපත් සමග ව්‍යාපෘතිය නොකර සිටීම වැලැක්වීමට ක්‍රියා කරන ලද ආකාරය, එකල සිටි ඇමරිකානු තානාපතිවරයා ඔහුගේ රාජ්‍ය දෙපාර්තමේන්තුවට යවන ලද පහත විද්යුත් ලිපිය  පසු කලෙක විකිලික්ස් විසින්  මුදා හරින ලදි.   

1.  (C) On June 5, Sri Lanka Director of Naval Projects and Plans (DNPP) Commodore Lakshman Illangakoon contacted Embassy's Office of Defense Cooperation (ODC) to provide a readout of a meeting in New Delhi with the Indian Navy Commander and others (no further information) on the proposed U.S.-provided coastal radar system. India had been pressing Sri Lanka to have the U.S. system moved to Sri Lanka's southern coast and install an Indian-provided system. Illangakoon told us the Sri Lanka Navy Commander had instructed him to hold firm that the U.S.-provided coastal radars should be installed in the north, if necessary over Indian objections. 2. (C) Commodore Illangakoon reported that during his meeting in New Delhi, the Indian Navy Commander said India is no longer pressing Sri Lanka to move the U.S. provided coastal radars to the south, and the radar installation may proceed as planned. India also plans to provide additional radars to Sri Lanka. Illangakoon told ODC that Sri Lanka will work with the U.S. team to esnure that the Indian radars can be integrated into the current U.S. program. 3. (C/NF) An Indian embassy official conveyed to Defense Attache that India would not press Sri Lanka or the U.S. to move U.S. provided radars but would consider other options, such as placing Indian-provided radars alongside the U.S. system to cover dead spaces. 4. (C) Embassy understands that DAO New Delhi will seek further confirmation of the Indian position via military channels and thanks Embassy New Delhi for its assistance. BLAKE

ඇමරිකාවේ MDA වැඩ පිළිවෙල  ඔවුන්ගේ  පාලනයක් නොවන මහා සාගරයෙන් ලෝක සාමයට තර්ජනයක් මතු නොවී තබාගැනීමට එය මහත් පිටුවලක් විය. එසේම   ලද අවස්ථාවෙන් ශ්‍රී ලංකාවේ නාවික හමුදාව තම  යුධ මෙහෙයුම් කාර්යක්ෂමව ඉටුකර ගැනීමට විපුල ප්‍රයෝජන ලදුවේය.  

අවසානය ඊළඟ බ්ලොග් එකෙන් 

3 ඇමෙරිකානු මිලිටරි ගිවිසුම් 3

ඉහත බ්ලොග් දෙකෙන්  පෙන්වා දුන් කරුණු සහ හේතු වලින් ඇමෙරිකාවට ලංකාවේ හමුදා කඳවුරක් පිහිටවීමට කිසිම හේතුවක් නොමැති බවත්, එසේ පිහිටවීමට ඔවුනට බලකරන කිසිම ගෝලීය දේශපාලන හේතුවක් නොමැති බවත් පැහැදිලිව පෙනී යයි.

මෙයට අවුරුදු 50  කට පමණ පෙර නම්, එලෙස කඳවුරක් පිහිටුවා ගැනීමට ඇමෙරිකාවට ඕනෑ කමක් තිබෙන්නට ඉඩ තිබිණ. ඒ ශීතල යුද්ධය ලොව පුරා පැවතී අවධියේදීය. ඒ කාලයේ වුවද ඇමෙරිකාව වියට්නාම් යුද්ධයෙන් බැට කා තම තුවාල ලෙවකමින් සිටි නිසා, තවත් එවැනි පටලැවිල්ලකට තුඩු දෙන හමුදා ස්ථාපිත කිරීමකට කිසිසේත්ම යන්නට හැකියාවක් තිබුනේ නැතැයි මම සිතමි.

අනෙක් විශේෂ කාරණය වන්නේ ඉන්දියාව අපේ රටට ඉතාම ලඟින් පිහිටා තිබීමය. ඉන්දියාව ඇමෙරිකාවට ඉතාමත් හිතවත් රටක් වීමය. ශීතල යුද්ධය කාලයේදී (1947-1991) අනෙක් බොහෝ යටත් විජිතයනට නතුවූ අනෙක් රටවල් මෙන් ඉන්දියාවද රුසියානු බල කඳවුරේ පැත්ත ගත්තද, ඔවුහු ඔවුන්ගේ අනාගතය තිබෙන්නේ කොයි පැත්තේදැයි හොඳින් දැන සිටියහ. මෙයට හොඳම උදාහරණයක් මම අත්දැකීම් කර ඇත්තෙමි. මම අපේ තවත් නිලධාරින් කණ්ඩායමක් සමග 1980 වසරේ ඉන්දියාවේ අවුරුද්දක මුලික පුහුණුව ලබමින් සිටියෙමි. මේ කාලයේ අප වැඩි කලක් සිටියේ දැන් කොච්චි යනුවෙන් හඳුන්වන එකල කොචින් නගරයේ ඇති විශාල නාවික හමුදා කඳවුරකය.

එකල දැන් කාලයේ මෙන් නිලධාරීන්ගේ නිවාසයන්හි පුද්ගලිකව රූපවාහිනි නොතිබුණු අතර හවසට රූපාවාහිනි නැරඹීමට නිලධාරි නිවස්නය වෙත යා යුතු විය. අප රටේ මේ කාලයේ වර්ණ රූපවාහිනි තිබුනද, ඉන්දියාවේ එකල තිබුනේ කළු සහ සුදු රුපවාහිනි පමණක් බවද මෙතැනදී සිහිපත් වෙයි. මේ කාලයේ සතියේ එක දිනක ඇමෙරිකානු හිටපු ජනාධිපති වරයෙකු වූ ජෝන් එෆ් කෙනෙඩි පිළිබඳව, යම් රූපවාහිනි කතාවක් ඉන්දියානු දුරදර්ශන් චැනලයේ සතිපතා විකාශනය වුනි. ඉන්දියානු නාවික හමුදා නිලධාරින් අතර ජනප්‍රියම රුපවාහිනි වැඩසටහන වුයේ එම ප්‍රෝග්‍රෑම් එක වූ අතර, රූපවාහිනි කාමරයේ එදිනට ලොකු නරඹන්නන් පිරිසක් සිටි නිසා, අප මේ දිනයේ රූපවාහිනි නරඹන්නට යාම මගහැරියෙමු.

කොතරම් සෝවියට් කඳවුරට මිත්‍රශීලි යැයි පෙන්නා ගෙන සිටියද, ඉන්දියාව හදවතින් සිටියේ බටහිරත් සමගය. ඔවුනගේ  එකල සිටම අරමුණ වුයේ බටහිර පන්නයට දියුණු වන්නටය. දැන් ඔවුන් එම අරමුණ සාක්ෂාත් කරගනිමින් සිටිති.

එවැනි මිතුරෙකු ගේ පිළිකන්නේ; ඉන්දියාව තම ස්වභාවික බල පරාසය යැයි සිතා සිටින වෙනත් කුඩා රටක කඳවුරක් ගසා, මෙතරම් බලගතු සහ මිත්‍රශීලි ඉන්දියාව තරහ කරගන්නට තරම් ඇමෙරිකාව අමනොඥ රටක් යැයි මම නම් නොසිතමි.

ඇමෙරිකාව මේ පැත්තෙන් ඉන්දියාවට ඇති ගෞරවය පෙන්වන්නට මම තවත් අත්දැකීමක් විස්තර කරනු කැමැත්තෙමි. ඒ 2005 වසරේ මම නාවික හමුදාවේ සැලසුම් සහ ව්‍යාපෘති අධ්‍යක්ෂක වරයාව සිටියදී සිදුවුවකි.

පහතින් දැක්වෙන්නේ  මා විසින් මගේ නාවික හමුදාවේ සේවා කාලය පිළිබඳව ලියන ලද ‘සතුරා මුහුදේදී මුලාකිරිම සහ තවත් නාවික කතා’ යන පොතෙන් උපුටා ගන්නා ලද්දකි. මෙහි MDA නමින් දක්වා ඇති ව්‍යාපෘතිය අමෙරිකාවෙන් යුධ සමයේදී අපට අප අවට මුහුද පිළිබඳව විමසිල්ලෙන් සිටීම සඳහා ලබාදුන් උපකරණ සහ මෘදුකාංග පද්ධතියකි.

 “යුද්ධයේ අවසානයක් දැකිය හැකි වන්නේ දිවයින වටා ඇති සාගරය පාලනය කිරීමෙන් බව අපට ඒ වන විට සක්සුදක් සේ පැහැදිලි වී තිබිණි. ඇත්තෙන්ම යුද්ධය අවසානයේ එම අදහසෙහි නිවැරදිබාවය පැහැදිලිවම ප්‍රත්‍යක්ෂ විය. රේඩාර් සමීකරණය අනුව කොතරම් ඉහලට රේඩාර් ස්කෑන් එක ගෙන ගියොත්, රේඩාර් යන්ත්‍රය උපරිම කාර්යක්ෂමතාවයකින් වැඩකර අපට හොඳම රේඩාර් චිත්‍රය ලබාදිය හැකි දැයි, රේඩාර් සමීකරණය උඩු යටිකුරු කරමින් ගණනය කලෙමු.  ලංකාවේ උසම රේඩාර් ටවර් පේදුරු තුඩුවේ, කල්ලරාවේ, චැපල්හිල් මත සහ ඩෙල්ෆ්ට් දූපතේ ගොඩනංවමින් සිටියෙමු.   

මෙවැනි අවස්ථාවක ඇමරිකානුවන්ගේ  MDA  ව්‍යාපෘතිය අපට දෙවියන් දුන්නක් හා   සමාන බව පෙනුණි. ඔවුන්ගේ උපකරණ අපේ කනුවල කඩිමුඩියේ සවි කෙරුණි. ඔවුන්ගේ තාක්ෂණය සහ උපකරණ වලින් මේ රේඩාර් කනු වලින් ලැබෙන රේඩාර් දර්ශණ, අපගේ ගුවන් විදුලි සම්ප්‍රේෂණ මගින් නාවික හමුදා මූලස්ථානයේ මෙහෙයුම් මැදිරිය වෙත රැගෙන එන ලද්දේය. මේවාට බොහෝ වියදම් දරන ලද්දේ ඇමරිකානු රජය විසිනි. තාක්ෂණයද ඔවුන් ගෙන් ලැබුණි. අප කාර්ය මණ්ඩලත් එසේ ලැබුණු තාක්ෂණය පන්නරයට ගනිමින් හා තව දුරටත් දියුණු කිරීමෙන්, උතුරු සහ නැගෙනහිර මුහුදේ රේඩාර් සහ කැමරා කුළුණු වලින් ලැබුනු දර්ශණ, එවේලේම නාවික හමුදා මූලස්ථානයේ සිට අධීක්ෂණය කරන්නට පුලුවන් ලෙසට වැඩි දියුණු කළහ.  එහෙත් අවසන පද්ධතිය පණ ගැණුනේ ඇමරිකානුවන්ට වඩා ප්‍රයෝජනවත් විය හැකි දත්ත ලභාගැනීමට ඔවුනට හැකියාව තිබූ අපගේ දකුණු වෙරළ තීරයේ  නොවේ, ඒවා සවි වුනේ අපගේ උතුරු සහ නැගෙනහිර වෙරළ තීරයන් වලය.   .............. ඊළඟ බ්ලොග් එකෙන්

2 ඇමෙරිකාව සමග මිලිටරි ගිවිසුම - 2

ඇමෙරිකාවට අපත් සමග මෙවැනි ගිවිසුමක් අත්සන් කිරීමට ඇති අවශ්‍යතාවයන් කුමන ආකාරයේ ඒවා වියහැකිද? 

මේවා රටක් විසින් බොහෝවිට හෙළිකරන ඒවාට වඩා වෙනස් වන හෙයින්, අප ඒවා කුමන ආකාර විය හැකි දැයි පරීක්ෂා කර බැලීම වඩා සුදුසු බව ඕනෑම කෙනෙකු පිළිගනු ඇත. එසේ ලොව බලවෙතුකට අප රට හා ගිවිසුම් ගතවීමට දැනට ලොව තිබෙන දේශපාලනික ආර්ථික සහ තාක්ෂණික  දියුණුව සලකා බලන විට, කුමන හේතු අප මනසට එයිද? ඒවා කුමන හේතු නිසා පිළිගැනීමට අපහසුද?

1.      ඇමෙරිකාව අප රට යම් ආර්ථික වාසියක් සඳහා ඔවුන් නතු කර ගැනීමට උත්සාහ කරති - මෙය කිසිසේත්ම විය නොහැකිය. ඔවුන්ට අප රට අල්ලාගෙන කිසිම වාසියක් ලබාගැනීමට නොහැක. අනෙක් අතින් නවීන ලෝකයේ රටවල් අල්ලා ගැනීම නොකරන එමෙන්ම නොකළැකි දෙයකි. අපේ බරට රත්තරන් දෙනවා කිව්වත් රටක් අප බාර ගැනුමට කැමති නොවනු ඇත.

2.     මන්නාරමේ තෙල් තිබෙන නිසා ඇමෙරිකාව අප රට පාලනය කිරීමට උත්සාහයක් දරයි. මේක හරියට තෙල් තිබෙන නිසා නයිජීරියාව අල්ලා ගැනීම වැනි වැඩකි. ඊට වඩා බොහෝ පහසු ලෙස ඇමෙරිකාව තෙල් වෙළඳපොල පාලනය කර  ඇමෙරිකාව සමාගම් මුදල් හොයති. අනෙක තෙල් තව අවුරුදු 20 ක් පමණ වනවිට වැඩකට නැති දෙයක් බවට පත්වෙයි.

3.     ඔවුන්ගේ යුධ මධ්‍යස්ථානයක් ලෙස අප රට පාවිච්චි කිරීමට ඇමෙරිකාව සැරසෙයි - මෙම කාරණය ගැන සලකා බැලීමට පෙර, ඇමෙරිකාවට එවැනි අවශ්‍යතාවයක් තිබේදැයි පරීක්ෂා කල යුතුය.

a.     ඕනෑම රටකට යුද්ධයක් කිරීමට නම් සතුරන් සිටිය යුතුය. අප රටෙහි යුධ බලයක් ස්ථාපිත කිරීමෙන් ඒ සතුරන් මර්ධනය කිරීමට යම් හැකියාවක් එම රටට ලැබිය යුතුය. අප ලඟම සිටින ප්‍රධාන රටවල් දෙක වන ඉන්දියාව සහ පකිස්තානය ඇමෙරිකාවේ ළඟ මිතුරන්ය. ඔවුන් නිසා නම් ඇමෙරිකාව මේ තරම් වියදම් කරගෙන මෙහි කඳවුරු ගසන්නට සිතන්නේ වත් නොමැත. ඊළඟ ප්‍රධාන අසියාතිකයා වන්නේ චීනයයි. බොහෝ ආරාවුල් පිටතින් පෙනුනද,  ඇමෙරිකාව සහ චීනය සෑම අතින්ම තදින්ම බැඳී ඇති රටවල් දෙකකි. මේ එක රටක් නොමැතිව අනෙකාට ජීවත්වන්නට බැරි තරමට ඔවුන් එකිනෙකා මත යැපෙති.  ඇමෙරිකාවට මේ වකවානුවේ ලෝකයේ සිටින්නේ එකම සතුරෙකු පමණි. ඒ ඉස්ලාම් අන්තවාදයයි. ඔවුහු ඇමෙරිකාවට යමක් කිරීමට කෙල හලමින් බලා සිටිති. ඇමෙරිකාවට අවැඩක් කිරීමට නොහැකි නිසා යුරෝපයට ඒවාටත් කරන්ට අපහසු නිසා, අපි වාගේ අහින්සකයෙකුටවත් පහරදීමක් කරන්නට බලති. ලංකාවේ හමුදා පහසුකමක් ස්ථාපිත කිරීමෙන් ඉස්ලාම් අන්තවාදයට කිසිම බලපෑමක් කරන්නට ඇමෙරිකාවට ලැබෙන්නේ නැත. මේ කරුණු සියල්ල සලකා බැලුවිට, ඇමෙරිකාවට සතුරන් හා යුධ වැදීමට ලංකාවේ හමුදා ස්ථාපිත කිරීමෙන් වැඩක් වෙන්නේ නැති බව පැහැදිලිය.

b.     සමහර දෙනෙකු ලෝකයේ මාධ්‍යය ලංකාව යයි සිතා සිටිති. එසේම ලංකාවේ සිට ලෝකයේ ඕනෑම තැනකට මිසයිල් විදීමට හැකියාවක් තිබේ යයිද, ඒ නිසා ලංකාව යම් විශේෂ රටක් යයි ඔවුන් සිතති. තැන යම් විශේෂ කෙනෙකු යයිද, තමන් මේ ලොවට පහල වී ඇත්තේ යම් විශේෂ හේතුවකටයි සිතීම හා සමානය. ගෝලයක අභ්‍යන්තරයේ ඇති කේන්ද්‍රය මිස, ගෝලයක් මත මාධ්‍යයක් තිබිය නොහැක. ඕනෑම රටකට තමන් ලෝකයේ මැද එසේත් නැත්නම් විශ්වයේ මැද  යයි සිතන්නට පුළුවන. අනෙක් කාරණය නම් එලෙස මිසයිල් ගසන්නට එලෙස ලෝකයේ මැද සොයාගෙන එතෙන්ට වී සිටිය යුතු නැත. න්‍යෂ්ටික බෝම්බ සහිත මිසයිල මුහුද යට සිට කිලෝ මීටර 10000 පමණ දුර ඉලක්කයකට මීටර් කිහිපයක් තුල පතිත කරන්නට හැකියාව ඇති න්‍යෂ්ටික සබ්මැරීන ලෝක බලවතුන් කිහිප දෙනෙකුටම තිබේ. මෙවැනි එක සබ්මැරිනයකට මිසයිල 150 ක් පමණ තිබේ. ඒවා 5 ක් පමණ නොයෙකුත් සාගරික ස්ථානයන්හි නවතා තැබුවේ නම්, ඕනෑම වෙලාවක ලෝකයේ ඕනෑම ස්ථානයක් විනාශ කිරීමේ බලය අයිති රටට ලැබේ. අනෙක් කාරණය මෙම මිසයිල විදින ස්ථානය භූමියක තබුනු විට සතුරන්ට ඒවා විනාශ කිරීමට පුළුවන. එහෙත් ඒවා ගැඹුරු මුහුදේ නොදන්නා ස්ථානයක තැබීමට සතුරාට එය දැනගෙන විනාශ කිරීමට නොහැකිය. ඇමෙරිකාවේ වැඩියෙන්ම ආරක්ෂා කරන රාජ්‍ය රහස වන්නේ මෙම සබ්මැරීන තිබෙන ස්ථානය වෙන්නේ මේ නිසාය.

c.      ඇමෙරිකාව කඳවුරු සදන්නට රටවල් හොයමින් සිටි - මේ වකවානුවේ ඔවුන් ඇත්තෙන්ම උත්සාහ කරන්නේ තියෙන කඳවුරුත් ගලවාගෙන වියදම් කපාහැ රිමටය. දැන් ඔවුන් කඳවුරු පවත්වාගෙන යනවාට සල්ලි ඉල්ලති. දකුණු කොරියාව ඒ සඳහා ඩොලර් බිලියනයක් මේ අවුරුද්දට දීමට පොරොන්දු විය. දැන් තිබෙන තාක්ෂණයත් සමග භෞතිකව ලෝකය සැමතැනම හමුදා තබාගන්නට කාටවත් අවශ්‍යතාවයක් නොමැත. ඇෆ්ගනිස්තානයේ බෝම්බ දමන මිසයිල විදින ගුවන් යානා පදවන්නේ ඇමෙරිකාවේ ගුවන් කඳවුරක සිටය. ලෝකයේ ඕනෑම තැනක සිදුවන දෙයක් සැනෙකින් බලාගන්නට චන්ද්‍රිකා මඟින් පුළුවන.

ඇත්තෙන්ම එසේනම් මෙම ගිවිසුම කුමකටද ?......... ඊළඟ බ්ලොග් එකෙන් 

අමෙරිකාවත් සමග මිලිටරි ගිවිසුම

මේ දිනවල ඇමෙරිකානු රජය සහ ශ්‍රී ලංකාව අතර ඇති කරගන්නට යන හමුදා ගිවිසුමක් ගැන බොහෝ දෙනා කතා කරනු පෙනේ. එම සාකච්ඡාව කොතරම් තිර්ව වී ඇද්ද යත් අප රටේ ඇමෙරිකානු තානාපතිතුමිය, මල්වතු මහනායක හාමුදුරුවන් මුණගැසී ඒ පිළිබඳව පැහැදිලි කරන්නට තරම් එය දුරදිග ගියේය.

නමුත් අවාසනාවකට අප වැනි අවශේෂ ජනයාට මේ පිළිබඳව පැහැදිලි කරන්නට කෙනෙක් නැත්තේය.  පැහැදිලි කරගනු ලැබූ අයවලුන්ද එය අපට පැහැදිලි කරන බවක් පෙනෙන්නට නැත. මේ ගැන නිතරම රූපවාහිනිවල  කතා කරන අයද ඒ පිළිබඳව කිසිම දැනුමක් නොමැතිව තමන්ගේ දේශපාලන වෛර පිරිමසාගන්නට ගිවිසුම් යොදාගන්න සැටියක්  පෙනේ. අනෙක් පැත්තට රජය පැත්තෙන් යම් වගකිවයුතු ඇමතිවරයෙකු; විදේශ ඇමතිවරයා හෝ ආරක්ෂක ඇමතිවරයා, මේ පිළිබඳව ප්‍රවෘත්ති සාකච්ඡාවක් කැඳවා පැහැදිලි කිරීමක් කරන බවක් පෙනෙන්නට නැත. එය ඇත්තෙන්ම ජනතාවට කලයුතු සේවයක් පැහැර හැරීමකි. රටේ පුරවැසියන් මෙලෙස අවුලෙන් අවුලට පත්කිරීමෙන් ඔවුන් යම් මානසික තෘප්තියක් ලබාගන්නවා දැයි සැකයක් ඇතිවන තරමට  ඔවුන් මෙලෙස පැහැදිලි නොකර සිටීම පුරුද්දක් කරගෙන සිටිති.

අවසානයේ මෙතන ඇත්තෙන්ම තියෙන දෙයට වඩා යම් දෙයක් තිබෙන්නේ දැයි සැකයක් පුරවැසියන් අතර ඇතිවෙයි. රජයට විරුද්ධ අය, විශේෂයෙන්ම පැරදී සිටින දේශපාලඥයන් සහ ඔවුනට උපකාර කරන මාධ්‍ය කරුවන් මෙය අවස්ථාවක් කරගෙන,  කුඩා ග්‍රහලෝකයක් ඇති තැන කළු කුහරයක් මවා පෙන්වති. දැන් රජය ප්‍රශ්නයේ යථා තත්වය පැහැදිලි කරන්නට උත්සාහ කරයි. එහෙත් දැන් පොරොවක් නොව යාන්ත්‍රික කියතක් වත් අවශ්‍ය වෙයි. සමහරවිට ඒ වනවිට අන්තරය කොළඹම නවතන පෙළපාලි දෙකක් වත් සංවිධානය කර අවසානය.

ප්‍රියම්බල් එක දැනටමත් දිග වැඩි නිසා මෙතනින් නවතන්නෙමි. 

දැන් මේ ඇමෙරිකාව සහ අත්සන් කරන්නට තටමන ගිවිසුම කුමක්දැයි පොඩ්ඩක් අධ්‍යයනය කරමු. මෙම ගනයේ ගිවිසුම් වලට ඇමෙරිකාව කියන්නේ status of force agreemant (SOFA) යනුවෙනි.   ඇමෙරිකාව බොහෝ මෙවැනි දේවල් වලට මෙවැනි acronym සාදන්නට රුසියන්ය. එරට තිබෙන සෑම දෙයකටම යම් acronym තිබේ. ඔවුන්ගේ රටේ නම වුවද acronym එකකි (USA).  ඒ ආගන්තුක රට තුල ඇමෙරිකානු හමුදාවන්ට ඇති තත්වය ( විශේෂයෙන් ආගන්තුක රටේ නිත්‍යානුකුලව) පැහැදිලි කරගැනීමටය. එවිට පසුකලෙක යම් සිදුවීමක් සිදුවුවහොත්; උදාහරණයක් වශයෙන් ඇමෙරිකානු භටයෙකු අතින් මාර්ග අනතුරකදී සාමාන්‍ය වැසියෙකු මියගියහොත්) ගතයුතු ක්‍රියාමාර්ග පිළිබඳව පැටලිල්ලක් නැත. එහිදී ගතයුතු ක්‍රියාමාර්ග SOFA එකේ පැහැදිලිව ලියා තිබේ.

මෙලෙස SOFA ගිවිසුමක් ගතවන්නේ ඇමෙරිකාවට එම රට තුල තමන්ගේ ආරක්ෂක හමුදා යම් අයුරකින් භෞතික ලෙස ස්ථානගත කිරීමක් කිරීමට අවශ්‍ය වේ යයි හැඟුන විටය. එම භෞතික ස්ථානගත කිරීම ඇමෙරිකානු යුධ නැවක් එම රටට සංචාරයක් සඳහා, එහි නැවියන් එම රටතුල සංචාරය කරන අවස්ථාවක සිට හදිසි යුද්ධයක් සඳහා ඇමෙරිකානු හමුදා බලඇණියක් ස්ථානගත කිරීම දක්වා පරාසයේ ඕනෑම තැනක සිදුවිය හැක.

ඇමෙරිකාව මෙවැනි SOFA ගිවිසුම් 100 කට වැඩි ප්‍රමාණයක් සමග දැනටමත් අත්සන් කර තිබේ. ඒවායින් 36 ක් පහත දැක්වෙන අතර ඉතිරිය අවශ්‍ය නම් ගුගල් කර බලාගත හැක.

1.     NATO රටවල් 26 සමග

2.     ජපානය

3.     දකුණු කොරියාව

4.     ඔස්ට්‍රේලියාව

5.     පිලිපීනය

6.     ගෞතමාලා

7.     හයිටි

8.     හොන්ඩුරාස්

9.     මාෂල් දුපත්

10.                        UK  .....................

මෙම ගිවිසුම් නොයෙක් හේතු නිසා ඇතිකරගත් ඒවා වෙති. එම හේතු අතර

1.බලඇණි ස්ථානගත කිරීම

2. කඳවුරු බැඳීම සඳහා දේපල බදු ගැනීම

3. යුධ අභ්‍යාස වැනි විශේෂ කාර්යයක් සඳහා

4. පුහුණු කිරීම් වැනි උදව් ලබාදීම සඳහා

5. මිලිටරි සහයෝගිතාවයන් සඳහා

6. මානුෂික මෙහෙයුම් යනාදිය සඳහා තාවකාලික සහාය දීම සඳහා

ප්‍රධාන වෙයි.

ඇමෙරිකාවට අප රට සමග SOFA ගිවිසුමක් අවශ්‍ය ඇයි? ඊළඟ කොටසෙන්

මහනුවර බුරියානි වර්ජනය

මේ දිනවල මුස්ලිම් කඩ සාප්පු වර්ජනය කිරීම පිළිබඳව ලොකු කතිකාවතක් අසන්නට, බලන්නට ලැබේ.

මට මෙම ප්‍රශ්නය නිසා පුද්ගලිකව ලොකු පාඩුවක් සිදුවිය. ඒ මහනුවර kandyan muslim හෝටලයෙන් බුරියානි මිලදිගන්නට ගොසිනි.අප කුඩාකාලයේ සිටම අපේ දෙමව්පියන් ඉඳහිට බුරියානි කමට සිතුනුවිට බුරියානි කෑවේ මුස්ලිම් හෝටලයෙනි. මුස්ලිම් හෝටලය හොඳ බුරියානි ජනතාවට ආහාරයට දුන්නා පමණක් නොව මස් කරී සහ රොටි කැමටද ජනප්‍රිය ස්ථානයක් විය. එය එකල හැඳින්වුණේ මුස්ලිම් හෝටලය යන නමිනි.

එහි නම kandyan muslim හෝටලය යනුවෙන් වෙනස්කර ඇත්තේ ළඟක දීද එසේත් නැත්නම් ඒ කාලයේම සිට නම මෙලෙස තිබුනද අප මුස්ලිම්භා විත කලේ  නමින් පහසුවටද යන්න මම නොදනිමි.

මේ ලඟකදී මම මේ කියන්නට යන ආපදාව මගේ මිතුරෙකුට කීවිට ඔහු කල කොමෙන්ට් එකකින් මම පුදුමයට පත්විය. ඒ මුස්ලිම් හෝටලය එකල ලංකාව පුරා කොතරම් ප්‍රසිද්ධ වී තිබුනේද යත් සමහර බුරියානි ලෝලීන් කොළඹ සිට කෝච්චියේ ඒ සඳහාම නුවරට පැමිණ මුස්ලිම් හෝටලයෙන් බුරියානි කා ආපසු කෝච්චියේ කොළඹ ගිය  බවයි. මෙහිද යම් සත්‍යතාවයක් තිබෙන්නට පුළුවන.

ඒ කාලයේ මුස්ලිම් හෝටලය ප්‍රසිද්ධ ව තිබුනේ කෑම සඳහාම පමණක් නොවේ. එයට අමතරව එය නුවර ටව්මේ මිනිසුන් මුණගැසෙන ස්ථානයක් ද විය. සමහරවිට දැන් එම කාර්ය සිදුවන්නේ KCC තුල වියහැක. 

උදාහරණයකට තලාතුඔය සිට සහ අමුණුගම සිට නෑයන් දෙගොල්ලක් යටිවාවල ප්‍රදේශයේ ජිවත්වන පවුලකින් කසාදයක් සඳහා තරුණියක් බලන්නට යනවා යයි සිතමු. එකල බොහෝ පවුල් වලට  ; ඉහලම මධ්‍යම පන්තියට එන තෙක්, වාහන තිබුනේ නැති නිසා ඔවුහු මුණගැසීමට දිනයක් දාගෙන මුස්ලිම් එකේදී යම් වෙලාවක් ; 18 වන අඟහරුවාදා වැනි,හමුවීමට යොදාගනිති. බස් වලින් පැමිණ මුස්ලිම් එකේදී මුණගැසෙන ඔවුහු මස් රොටි කා තේ එකකුත් බි බස් ස්ටෑන්ඩ් එක ළඟ ටැක්සි ස්ටෑන්ඩ් එකෙන් වාහනයක් කුලියට ගෙන යටිවාවලට යති.

මුස්ලිම්ම එකේ ඉතිහාසය ගැන තව බොහෝ දෑ ලියන්නට පුළුවන. ඒ කාලයේ නුවර අවට ගණිකා නිවාස කිහිපයක්ම තිබුණි. සමහර විට මුළු ගමක්ම වාගේ එම ව්‍යාපාරයේ යෙදුනු අවස්ථාද තිබුණි. මෙම ගණිකා නිවාස වලට කෙලින්ම යාමට නොහැකි පාරිභෝගිකයනට උදව් කර ජිවිත ගැටගහ ගන්නා කිහිප දෙනෙකු ඔවුන්ගේ රැකියා කලේද මුස්ලිම් හෝටලය අවට සිටය. එතැනදී ඩිල් එක කතාකරගෙන පාරිභෝගිකයා නරක ප්‍රසිද්දියක් ඇති නිවසට (house of ill reputation) ගෙන යාම ඔහුගේ සේවය විය. ඒ සඳහා ඔහුට දෙපැත්තෙන්ම ගතමනාවක් ලැබිණ.

මට සිදුවූ ඇබැද්දිය වෙනත් ආකාරයක එකකි. අපි ගෙදර කෑමට  සිටින 4 දෙනාට බුරියානි 3 ක් ද වැඩිපුර රොස්ට් කුකුලන් කොටසක් ද මිලදී ගත්තෙමු. ඒ බුරියානි එකේ බත් එක් අයෙකුට වැඩි නිසාය. ගෙදර ඇවිත් බුරියානි කම සඳහා ඇපර්ටයිසර් එකක් ලෙස  100 ක ෂොට් එකකුත් පානය කර කෑම සඳහා ඉඳ ගතිමු. 

අහෝ ඛේදයකි! බුරියානි එක කටේ තියන්නට බැරි තරමට ලුණු දමා තිබිණ. ලුණු වැඩිවී ඇත්තේ බත්වල පමණක් යයි සිතාගෙන රොස්ට් චිකන් කෑල්ල කන්නට උත්සාහ කලෙමි. එය ඊටත් අන්තය. බත්වල පොඩි වෙනසක්ද දැනුනි. ගෙදර තිබුණු පාන් කැල්ලක් ආහාරයට ගෙන බඩගින්න සන්සිඳවා ගත්තෙමු.

මට හිතෙන්නේ මෙම වර්ජනය නිසා මුස්ලිම් කඩවල ආහාර ඉතිරි වී ඒවා ෆ්රිසර් වල දමා නැවත රත්කර දෙන්නට පටන්ගෙන ඇත.

මෙම අනුමානය සත්‍ය නම් මුස්ලිම් කෑම කඩවලට ඒ පිළිබඳව ලැබෙන ප්‍රසිද්ධියෙන් ලැබෙන ප්‍රතිපලය , කෑම  වර්ජනය කරන ලෙස කරන වැඩපිළිවෙලට වඩා භයානක වනු ඇත. 

රහස්‍ය

මා  ගුවන් ගමනක යෙදෙන විට මුලින්ම කරන්නේ ඉදිරිපස මල්ලේ ඇති සඟරා දෙක; ඩියුටි ෆ්‍රී සහ ගුවන් සමාගමේ මාසික සඟරාව, උඩින් පල්ලෙන් කියවීමයි. ඊටපසු චිත්‍රපට බලන්නට පටන් ගනිමි. පසුගිය දිනක මෙලෙස ගුවන් යානයක පැමිණෙන විට චිත්‍රපට බලන්නට පටන් ගන්නා විට ඉයර් පෝන් එක හරියට ඇසෙන්නේ නැති බව වැටහුණි. යන එන ගුවන් සේවිකාවක් අල්ලා ගෙන එය මාරුකර ගත්තෙමි. අදෝමය, එම ඉයර් පෝන් එක පෙර තිබු එකටත් අන්තය, නැවත වරක් ඉයර් පෝන් මාරුකිරීමට ඉල්ලා සිටීමට මට මැලිකමක් ඇතිවිය; මම මෙවැනි අවස්ථාවල assertive මදි බව මට පෙරත් පෙනීගොස් ඇත. මම චිත්‍රපට බැලීම අතහැර නැවත සඟරා කියවන්නට පටන් ගත්තෙමි.

එහෙත් ගුවන් යානාවල යද්දී මට චිත්‍රපට බැලීමේ addiction එකක් ඇති සැටියා මෙනි. මම නැවත වරක් චිත්‍රපටයක් දමාගෙන  talkies ඒමට පෙර නැරඹු ආකාරයට චිත්‍රපටයක් බලන්නට උත්සාහ කලෙමි. ටික වෙලාවකින් මෙය එපාවූ නමුදු මට අපුරු අදහසක් මතුවිය. ඒඉංග්‍රීසි  subheadings ඇති වෙනත් භාෂාවක චිත්‍රපටයක් නැරඹීමයි.

මුලින්ම හමුවූ එවැනි චිත්‍රපටය මලයාලම් එකක් විය. මම එය බලන්නට පටන් ගතිමි. පරම්පරා ගණනක් සැලසුම් කර ඉඩමක් මිලදී ගැනීමට උත්සාහ කරන ඈත දුෂ්කර කඳු මුදුනක පිහිටි එනසල් වත්තක පණිවුඩ කරුවෙකු පිළිබඳව වූ මේ කතාව ඉතාමත් සිත්ගන්නා ආකාරයෙන් සාදා තිබුණි. එනසල් වතුවල කම්කරුවන්ගේ දුෂ්කර ජීවිත, කොමියුනිස්ට් ආණ්ඩු නිසා ඇතිවී ඇති අවුල් කම්කරු සම්බන්ධතා, සුළු ඉඩම් හිමියන් මුහුණ දෙන ප්‍රශ්න, මිනිසුන් එකිනෙකා විශ්වාශ කිරීම් යනාදී බොහෝ ප්‍රශ්න වලින් පිරුණු; මෙම චිත්‍රපටිය මම ඉතාමත් ආසාවෙන් නැරඹුවෙමි.

නමුත් අවාසනාවකට මෙන් චිත්‍රපටිය අවසානවීමට පෙර යානය කොළඹට ළගා වුනු අතර මම එහි නම මතක තබාගැනීමට පෝන් එකෙන් ඡායාරුපයක් ගන්නට සිතා සිටියද එය අමතක වී ගෙදර පැමිණියෙමි.

ගෙදර පැමිණි පසු මෙම චිත්‍රපටිය යු ටියුබ් එකෙන් සොයාගෙන ඉතිරි කොටස බැලීමට සිතා සිටියද එහි නම හරියට දන්නේ නැතිව එය සොයාගැනීම එතරම් පහසු නොමැති බව මට පෙනී ගියේය. වචන තුනක් වූ චිත්‍රපටයේ නමේ තුන්වන වචනය ‘මලෙයි’ බව මට මතක තිබුණි. මේ අතර මට මිතුරෙකු නිර්දේශ කල නිසා 1000 රුපි නෝට් නම් ඉන්දියානු ප්‍රධාන ධාරාවේ නොවන චිත්‍රපටයක් netflix චැනලයේ බැලුවෙමි.

දුප්පත් කාන්තාවකට ඡන්ද කාලයේ දේශපාලඥයකු විසින් දෙන ලද රුපියල් 1000 නෝට්ටුවක් නිසා ඇයට විඳින්නට සිදුවන කරදර මාලාවක් තුලින් ඉන්දියානු සමාජයේ ඇති අසාධාරනකම් පෙන්වාදෙන මෙම චිත්‍රපටිය ඉතාමත් කලාත්මක අයුරෙන් නිපදවා ඇත. ඉතාමත් අඩු වියදමකින් නිපදවා තිබුනද තේ එකක් බොන්නවත් ඇස අහකට ගන්න සිතුනේ නැති චිත්‍රපටයකි.

netflix චැනලයේ අපි චිත්‍රපටයක් තෝරාගත් විට එයට යටින් ඒ හා යම් අයුරකින් සමාන වන චිත්‍රපට 10 ක් පමණ යටින් පෙන්වයි. මගේ වාසනාව මතුවුයේ මෙතනදීය. කුමන හෝ හේතුවකට; බොහෝ විට ඉන්දියානු චිත්‍රපටයක් නිසා වෙන්නට පුළුවන, මට ගුවන් යානයේදී කොටසක් අතහැරුණු, මා සොයමින් සිටි චිත්‍රපටය දක්නට ලැබුණි. ඒත් එහි තුන්වන වචනය ‘මලෙයි’ ලෙස දුටු නිසාය.  

මෙම චිත්‍රපටිය පෙර කිව්වාක් මෙන් ඉතාමත් සිත්ගන්නා සුළු එකක් වූ අතර මෙය බලද්දී එය හා සම්බන්ධ චිත්‍රපටි 10 ස්ක්‍රීන් එකේ වැටුණි. මෙයින් නැරඹීමට වඩාත් සුදුසු යැයි සිතුනු තවත් චිත්‍රපටයක් වූ රහස්‍ය නම් චිත්‍රපටය ඊළඟ දවසේ බැලීමට තෝරාගෙන මගේ ලිස්ට් එකට දමා ගත්තෙමි.

මෙම චිත්‍රපටිය 2008 වසරේ සත්‍ය සිද්ධියක් ඇසුරෙන් නිපදවා ඇති බව මම චිත්‍රපටිය බලා අවසන් වූ පසු ගුගල් එකෙන් ඉගෙනගතිමි.

මම කුඩා කලසිටම රහස් පරීක්ෂක කතා කියවන්නටත් එම චිත්‍රපට බලන්නටත් මහත් ලොල් කමක් දැක්වුවෙමි. ටින් ටින් (මෙය උච්චාරණය කල යුත්තේ ටන් ටැන් ලෙස බව අපේ 8 පන්තියට ඉංග්‍රීසි ඉගැන්වූ ජයසිංහ මහත්මයා කිවූ බව මතකය) ගේ රහස් පරීක්ෂණ වලින් පටන්ගත් මෙම බැඳීම් පෙරී මේසන්, ජේම්ස් බොන්ඩ් ( my name is Bond, James Bond) ,  ජේමිස් බන්ඩා ( ඩිමන් ආනන්ද), ඩිකී වීරකෝන්, ෂර්ලොක් හොල්ම්ස් යනාදී වශයෙන් ව්‍යාප්ත විය ............ 500 පැන්න නිසා ඊළඟ බ්ලොග් එකට