ඩයස්පෝරාවෙන් ආයෝජන ගෙන්වා ගැනීම

 ඇමතිවරයෙක් ලංකාවට ආයෝජන ගෙන්වා ගැනීම සඳහා ඔස්ට්‍රේලියාවට ගිය ගමනක පින්තූර  බොහෝ ගණනක් ෆේස්බුක් එකේ දැක්කෙමි. 

මේවා දැකීමෙන් පසු මට මගේ අත්දැකීම් දෙකක් මතක් විය. 

එකක් දැන් අවුරුදු තුනකට පමණ පෙර මම මිරිස් වගාවක් කළමනාකරණය කිරීම සඳහා වැල්ලවායට ගොස් සිටියදී දුටු දෙයකි. එහි කැලේ ඇතුලට වන්නට රජයට අයත් විශාල ඉඩකඩම් , මිනිසුන් අල්ලාගෙන සිටිති ;සමහර විට එසේ අල්ලාගෙන සිටින නිසා විය යුතුය, ඒවායේ හරි වගාවක් කරන බවක් පෙනෙන්නට නැත. වරක් හරක් කිහිපදෙනෙකු පමණක් සිටින අක්කර දෙසීයක ඉඩමක් මම දුටුවෙමි. 

අනෙක් අත්දැකීම, දැන් බොහෝ කලක සිට ඔස්ට්‍රේලියාවේ පදිංචි වී සිටින මගේ පාසැල් මිතුරෙකු මගෙන් ඔහුට වගාවක් කිරීමට ලංකාවේ අක්කර 25ක් පනහක ඉඩමක් සොයා දෙන ලෙස ඉල්ලා සිටීමයි. ඔහු මෙරට නිතරම සිටින්නේ නැත්නම් එසේ ඉඩමක් වගා කිරීම පහසු නොවන කටයුත්තක් බව මම ඔහුට කියා සිටියද ඔහුව ඉතා උනන්දුවකින් මේ ඉඩම සොයමින් උන්නේය. 

මේ දෙක සම්බන්ධ කර බැලූ විට පිටරට ගොස් පදිංචිව සිටින ලංකාවේ ඩයස්පෝරාවට මෙහි ආයෝජන  දිරිමත් කිරීම ඉතාමත් පහසුවෙන් කළ හැකි ්‍රමවේදයක් තිබෙන බව පෙනී යයි. 

රජය කළ යුතු වන්නේ මෙලෙස රජයට අයත් වගා කළ හැකි ඉඩම් සියල්ල ඩේටා බේස් එකකට දමා ඒවා අවුරුදු පනහක වැනි දීර්ඝ කාලීන බදු වලට ඩොලර් වලට පමණක් ලබාදීමයි. 

මෙලෙස ලබාදීම විවෘත විනිවිද පෙනෙන ටෙන්ඩර් ක්‍රමයකින් ලබාදීමෙන් රජයට ඉහළම ආදායමක් ලැබෙන අතර ඒවාට ආයෝජනය කරන්නන්ට අසාධාරණයක් ද සිදු නොවේ. 

මෙවැනි ක්‍රමවේදයක් ඉතාමත් පහසුවෙන්  පණ ගන්වන්නට පුළුවන. ඉන්පසු එවැනි ආයෝජන අවස්ථාවන් තිබෙන බව සමාජ මාධ්‍ය හරහා ප්‍රසිද්ධ කර වෙබ් සයිට් එකක සියලු විස්තර දමා තිබෙන්නේ නම් ඒ ඒ රටවලට ගොස් ඩයස්පෝරාවට මේවා ගැන කියන්නට අවශ්‍යතාවයක් ඇතිවන්නේත් නැත. 

අනෙක මෙලෙස ආයෝජනය කරන අය තාක්ෂණිකව බලගැන්වුණු පුද්ගලයන් නිසා එවැනි ඉඩකඩම් හරවත් දේකට යොදා ගැනීමද එසේම කෘෂිකර්මික කටයුත්තක් වුණත් නවීනතම ඉහළම තාක්ෂණයෙන් ම සිදුවනු ඇත. 

මෙවැනි කටයුත්තකින් රටේ ආර්ථිකය හි සීඝ්‍ර දියුණුවක් ලබාගනු ඇති අතර බොහෝ තරුණ තරුණියන්ට රැකියා අවස්ථාවන් ද ලැබෙනු ඇත. එසේම තමන්ගේ රටට යම් සේවයක් කරන්නට යම් ආයෝජනයක් කරන්නට ආයෝජන අවස්ථා සොයමින් සිටින අපේ ඩයස්පෝරාවේ සහෝදර සහෝදරියනට මෙවැනි ආයෝජනයක යෙදී ම තමන්ගේ රටට යම් සේවයක් සිදුවන ආකාරය බලා සතුටු වන්නට ද පුළුවන.