Thursday, October 5, 2017

5 ජාතික ආරක්ෂාවට ඇති තර්ජන 5



http://lakshmanillangakoon.blogspot.com/2017/09/4-4.html සිට 





මෙයට හොඳම උදාහරණය දකුණු චීන මුහුදේ පිහිටි දුපත් සමුහයයි. එහි ඇති ස්ප්‍රට්ලි දුපත් චීනය,වියට්නාමය ,මැලේසියාව ,පිලිපීනය, සහ බෘනායි අයිතිවාසිකම් කියති.
පාර්සල් දුපත් චීනය, තායිවානය සහ වියට්නාමය,අයිතිවාසිකම් කියති.එහෙත් චීනය අල්ලා ගෙන සිටියි. මක්ල්ස් ෆීල්ඩ් දුපත මුහුදෙන් උඩට එන්නේ නැති නමුදු චීනය , පිලිපීනය සහ  තායිවානය අයිතිවාසිකම් කියති. මුහුදෙන් උඩට ගල් කිහිපයක් පමණක් තිබෙන ස්කාර්බෝරෝ දුපත් වලටද අයිතිකරුවන් තිදෙනෙකි, ඒ චීනය ,තායිවානය සහ පිලිපිනයයි.

එනමුදු ශ්‍රී ලංකාව සහ ඉන්දියාව මෙම මුහුදු සිමා සහ මුහුදු සිමා ප්‍රශ්නය ඉතාමත් සාමකාමී ලෙස විසදා ගෙන ඇති ආකාරය බොහෝ විශාරදයන්ගේ පැසසුමට ලක්වේ. විශේෂයෙන්ම බලගතු රටක් වන ඉන්දියාව සන්සන්දනාත්මකට බොහෝ කුඩා අප වැනි රාජ්‍යයක් සමානයන් සේ සලකා මෙම ප්‍රශ්නය විසදා ගැනීම ප්‍රශංසා කටයුතුය.
e. මෘදු බලය.
මෘදු බලය යන සංකල්පය ප්‍රථමයෙන්ම ඉදිරිපත් කරන ලද්දේ හාවඩ් විශ්ව විද්‍යාලයේ ජෝෂප් නයි විසින්[1] 1990 වර්ෂයේදීය. එයින් අදහස් කෙරෙනුයේ බලය හෝ ආර්ථික මෙවලම් පාවිච්චි කරන්නේ නැතිව, සිත් ඇද ගැනීමෙන් සහ හොඳින්, ඉලක්ක ගත රජයෙන් තමන්ට අවශ්‍ය ආකාරයට යමක් කර ගැනීමට ඇති හැකියාවයි. මෙම මෘදු බලයේ ප්‍රධානම ලක්ෂණය යුධ හෝ ආර්ථික බලයන් පාවිච්චි නොකිරීමයි. මෘදු බලය වැඩිකර  ගැනීමට සංස්කෘතික, දේශපාලන විශ්වාස සහ අගයන් සහ විදේශ ප්‍රතිපත්ති ප්‍රධාන ධාවකයන් වෙයි.
වොයිස් ඔෆ් ඇමරිකා වැනි ප්‍රචාරණ කටයුතු, අප කුඩා කල අපට හුරු පුරුදු නොමිලේ තැපෑලෙන් ගෙදරටම එවූ සෝවියට් දේශය වැනි සඟරා, හොලිවුඩ් සහ බොලිවුඩ් චිත්‍රපට වලින් ලොව පුරා සිටින නරඹන්නන්ට සංඛේතමය වශයෙන් අදහස් ඇතුලු කිරීම මෘදු බලය පිළිබඳ හොඳ උදාහරණ කිහිපයක් වෙයි. දැන් නිපදවෙන ඒක් ප්‍රේම් කතාවක්, ටොයිලට් චිත්‍රපටය පුද්ගලිකව නිෂ්පාදනයක් වූවක් වුවද, ඉන්දියාවේ අගමැති නරේන්ද්‍ර මෝඩිගේ ඉන්දියාවේ සියලු පුරවැසියනට වැසිකිලි ගොඩනැගීමට පෙලඹවීමට කරන ව්‍යාපෘතියට මහත් පිටුවහලක් වනු ඇත. මෙවැනි ප්‍රචාරණ කටයුතුද රටක් තුල වුවද මෘදු බලය පෙන්නුම් කරන උදාහරණයකි.
චීනය සහ ඉන්දියාව අප්‍රිකාවේ දුප්පත් රාජ්‍ය වල සිදු කරන බොහෝ විට සංඛේතාත්මක සංවර්ධන කටයුතුද මෙවැනි මෘදු බලයක් තම ව්‍යාපාර කටයුතු වලට ලබා ගැනීමට කරන උත්සාහයක් සේ සැලකිය හැක. සමහර අවස්ථාවන්හිදී යම් රටක නිපදවන වෙළඳ භාණ්ඩයක් වුවද එම රටට යම් මෘදු බලයක් ලබාදිය හැක. උදාහරණයක් වශයෙන් පින්ලන්තයේ නිපදවූ නොකියා ජංගම දුරකථන හැදින්විය හැක. සමහරුන් පින්ලන්තය යැයි රටක් තිබෙන බව දැන ගත්තේ නොකියා දුරකථන වෙළඳ පොලට පැමිණි පසුය. 


f. එහි කුමන සම්පත් තිබේද.
රටක ස්වාභාවික සම්පත් එම රටෙහි ජාතික ආරක්ෂාව සැලසුම් කිරීමේදී වැදගත්කමක් උසුලයි. විශේෂයෙන්ම ඛනිජ තෙල් සංචිත තිබෙන රටවලට මෙම වැදගත්කම තදින් බලපායි. ලෝකයේ සෑම කාර්මික රටකටම ඛනිජ තෙල් පහසු මිලකට එමෙන්ම බාධාවකින් තොර ලබා ගැනීම ඔවුන්ගේ රටවල ආර්ථිකයට ඉතාමත් ප්‍රබල අවශ්‍යතාවයක් වන හෙයින් මෙවැනි සෑම රටක්ම ඛනිජ තෙල් සංචිත පොහොසත් රට වලට බලපෑම් කිරීම ස්වාභාවිකය. මෙලෙස එම කාර්මික රටවල ඇති තරඟය නිසා ඛනිජ තෙල් ඇති රටවලට තම ජාතික ආරක්ෂාව සැලසුම් කිරීමේදී විශේසයෙන් සැලකිලිමත් වීමට සිදු වෙයි.
එහෙත් මෙම ඛනිජ තෙල් වල ඇති වැදගත්කම ලෝක ශිෂ්ඨාචාරයේ දියුණුව, විකල්ප බල නිෂ්පාදනය, මාධ්‍ය; සමාජ සහ ප්‍රවේනික ප්‍රබල වීම, හා වඩාත් කාර්යක්ෂම යන්ත්‍රෝපකරණ නිපදවීම නිසා අඩුවන හෙයින් මෙම බලපෑම් ක්‍රමයෙන් අඩු වී යන බව පෙනේ. රටවල තිබෙන නොයෙකුත් සම්පත් නිසා ඒවායේ රාජ්‍ය බලය වැඩි වීම ස්වාභාවිකය. උදාහරණයක් වශයෙන් ඇමරිකා එක්සත් ජනපදය ලෝකයේ තුන්වෙනියට විශාලම රට වන අතර ජනගහනයෙනුත් තුන්වෙනි රට වෙයි. එහෙත් එහි වගාකල හැකි මුලු ඉඩම් ප්‍රමාණය භූමි ප්‍රමාණයෙන් 17.3% ක් වෙයි. රටෙහි භූමි ප්‍රමාණය වැඩි වුවද රුසියාවේ වගාකල හැකි භූමිය 13.3% ක් වෙයි. චීනයේ මෙය 10.9% කි. මෙලෙස රටෙහි ප්‍රමාණය තරමක් කුඩා වුවද ඇමරිකා එක්සත් ජනපදයේ ගොවිතැන් කල හැකි ඉඩම් ප්‍රමාණය වැඩි නිසා කෘෂිකර්මාන්තය ඉතා දියුණු තත්වයකට ඒමට හැකියාව ලැබී ඇත.
සම්පත් විශාල වශයෙන් තිබෙන රටකට ජාතික ආරක්ෂාව සැලසුම් කිරීමේදී මුදල් පිළිබඳව කරදර වන්නට සිදු නොවේ. ඔවුනට ලෝකයේ නවතම තාක්ෂණවෙන් යුත් යුධ උපකරණ මිලදී ගන්නට පුලුවන. මැද පෙරදිග ඛනිජ තෙල් නිපදවන රටවල් උදාහරණයක් වශයෙන් ලෝකයේ දියුණුම රටවල නිපදවන අවි ආයුධ සහ උපකරණ මිලදී ගන්නට යොමුවන්නේ  ඔවුනට රටෙහි සාමාන්‍ය යටිතල පහසුකම් සහ පුරවැසි ජීවන තත්වයන් හොදින් පවත්වා ගනිමින් ජාතික ආරක්ෂාවටද සිතැඟි ආකාරයට මුදල් යෙදවීමටද හැකියාව ලැබී තිබෙන නිසාය.  
එහෙත් එතරම් සම්පත් නොමැති අප වැනි රට වලට “තුවක්කුද? බටර්ද?“ යන කියමනේ පරිදි අපට ඇති ධනය ආයෝජනය කල හැක්කේ ඉතාමත් සීමිත ලෙසටය. ඒ නිසා බොහෝ විට දුප්පත් රට වලට ජාතික ආරක්ෂාව සැලසුම් කරද්දී ඉතාමත් සකසුරුවම් ලෙස එය කිරීමට සිදුවේ. නව තාක්ෂණ යොදා ගනිමින් නිර්මාණාත්මකව පෙට්ටගමෙන් පිටතට අදහස් දියුණු කර ගැනීමෙන් අපට විශේෂයෙන් කටයුතු කිරීමට සිදුව ඇත්තේ මෙම තුවක්කුද බටර්ද ප්‍රශ්නය නිසාය.


to be continued 


[1] Bound to lead: The Changing Nature of American Power, Joseph Nye, 1990. 

No comments:

Post a Comment

සතුටින් ජීවත් වීමේ සරල ක්‍රම

 පසුගිය වසර හය තුළ ෆින්ලන්තය ලෝකයේ සතුටින්ම සිටින රට ලෙස ශ්‍රේණිගත කර ඇත.  මම මගේ ජීවිතයේ වැඩි කාලයක් මෙහි ජීවත් වූ අතර, මනෝවිද්‍යාඥයෙකු සහ ...