Saturday, December 9, 2017

වර්ජන වලට මුහුණ දිය යුත්තේ කෙසේද ? සරල උපදෙස් කිහිපයක්





ලංකාවේ තරම් වර්ජන ලෝකයේ කිසිම රටක ඇත්තේ නැත, ඉන්දියාවේ සමහරවිට ප්‍රාදේශීය මට්ටමෙන් තිබෙන්නට පුළුවන, එහෙත් ජාතික වශයෙන් නම් මේ වගේ විහිළුවක් ලෝකයේ කිසිම රටක ඇත්තේ නැත.

තමන්ගේ වෘතියට පිරිස් වැඩි වනවාට විරුද්ධව කොටසක් වර්ජන කරති, තව කොටසක් තමන්ගේ රැකියාවට බඳවා ගැනීමේදී සුදුසුකම් වැඩි නොකරන ලෙසට ඉල්ලා වර්ජනය කරති. තවත් කොටසක් තමන්ට නිකන් දෙන දෙය වෙන කෙනෙක් සල්ලි වලට ගන්න වාට විරුද්ධව වර්ජනය කරත්. තවත් වරෙක හොරෙන් වතුර ගත්  කෙනෙකු අල්ලන්නට ගිය විට තමන්ට කරදර කලේ යයි වර්ජනය කරති.

මෙලෙස වර්ජන ඇතිවන්නේ ඇයි? මෙයට හේතුව හොයාගන්නට හොඳම ක්‍රමය වර්ජන වැඩියෙන්ම ඇතිවන ආයතන මොනවාද යයි සොයා බැලීමය. දැන් ලංකාවේ සිදුවන ප්‍රධාන වර්ජනය දුම්රිය වර්ජනයයි. ඊට පෙර සිදුවුය වෛද්‍ය වර්ජනයයි. ඊට කලින් මතක හැටියට සිදුවුයේ විදුලි බල මණ්ඩලයේ වර්ජනයයි. මේ සියලු වර්ජන බලවන විට සිදුවී ඇත්තේ රජයේ ආයතන වලය. එසේ මේවා අති බහුතරයක්  රජයේ ආයතන වල පමණක්  සිදුවීමට හේතුව කුමක්ද?
අනික් කරුණ නම් අඩු තරමින්  පුද්ගලික අංශය සමග තරඟ කරන්නට හෝ සිදුව ඇත්තේ නම් එවැනි රජයේ ආයතන වල වර්ජන සිදු වීමත් බොහෝ අඩුවී තිබේ. හොඳම උදාහරණය ලංගමය වෙයි . පුද්ගලික බස් වලට ඉඩ දීමට පෙර මාසයකට වරක් වත් ලඟම ස්ට්‍රයික් එකක තිබුණි , දැන් අහන්නට වත් නැත.
ඇත්තෙන්ම  බැලූ බැල්මට වැඩිපුර ස්ට්‍රියික් තිබිය යුත්තේ පුද්ගලික අංශයේය. මක්නිසාද රජයේ ආයතනයක් යනු ජනතාවට අයිති ආයතනයකි, එහි වැඩ කරන්නෙත් ජනතාවගෙන් කොටසකි,එසේනම් ඔවුන් උත්සාහ කරන්නේ ජනතාවට හොඳ සේවයක්  ලබාදීමටය, එසේ නම් වර්ජන රජයේ ආයතන වල සිදුවී ධනපති ව්‍යාපාරිකයන් මෙහෙයවන පුද්ගලික ආයතන වල වර්ජන සිදුවීම අප තර්කයේ පරස්පරයක් බව පෙනේ.
මට හිතෙන විදිහට ලංකාවේ පුද්ගලික ආයතන වල වර්ජන නොවෙන්න හේතුව වැඩි වැටුප්, වඩා හොඳ සේවා පහසුකම් හෝ වැඩි නිවාඩු යනාදිය නොවේ, එයට මුලික හේතුව වර්ජන කර ව්‍යාපාරය  වැසුනොත් පාඩුව සිදුවන්නේ තමන්ටම බව දන්නා නිසාය. අනික ඒවායේ වෘතිය සමිති වලට එතරම් පිළිගැනීමක් නැති නිසාය. අනික් පැත්තෙන් මා දන්නා හැටියට වෘතිය සමිත් වැඩ කිරීමට රජයේ ආයතන වල ඒවායේ නායකයන් කිහිප දෙනෙකුට පඩි ගෙවා නිකං ඉන්නටද ඉඩ දී තිබේ. මොවුන් ට ඒ නිසා දවස පුරා එකතුවී හොඳින් වර්ජන කරන්නේ කොහොමදැයි සාකච්චා කරමින් ඉන්නට පුළුවන.
මේ කරුණු සලකා බැලුවිට වර්ජන අඩු කරගන්නට නම් පහත ක්‍රියා මාර්ග අනුගමනය කලයුතු බව සක්සුදක් සේ පැහැදිලි වෙයි.

  • සැම රජයේ ආයතයක්ම පුද්ගලික කළමනාකාරිත්වය යටතේ  සිදුකිරීම.
  • මුලු ආයතනයම පුද්ගලික කරණය කල නොහැකි නම් ඒවායේ වැදගත් සේවා  බාහිර මුලාශ්‍ර වලින් ලබාගැනීම 
  • බැංකු වලට සහ ලංගමට  කලාක් මෙන් සැම රජයේ ආයතන ක්‍රියාත්මක වන ක්ෂේත්‍රයක් තුලම පුද්ගලික අංශයට තරඟ කරන්නට ඉඩ ඇතිකිරීම.
  • සැම රජයේ ආයතනයන්ට ඒකාධිකාරය ඇති ක්ෂේත්‍ර වල වැදගත් කාර්යයන් සඳහා හමුදා පුහුණු කර තබා ගැනීම. උදාහරණයක් වශයෙන් දුම්රියේ වැනි  බර ඩිසල් එන්ජින්  පිළිබඳව නාවික හමුදාවට මනා දැනුමක් ඇත, මක්නිසාද නාවික යාත්‍රා වලද ඇත්තේ එවැනි එන්ජින් බැවිනි, මෙවැනි ගැලපෙන ආයතන යුගල කල හැක,
  • ආයතන විනයද ඉතා වැදගත්ය, වර්ජන කරන්නන්ට උසස්වීම් ලබාදීමේදී ලකුණු අඩුවන ක්‍රමයක්ද මෙයට ඇතුල් කල හැක.

Sunday, December 3, 2017

ස්වයං ධාවක වාහන සහ අපේ ප්‍රශ්න




ස්වයං ධාවක  වන වාහන පිළිබද බොහෝ දෙනා කතා කරති. ඉතා මෑත කාලයේදී; 2014 පමණ පටන් ගැනුණු මේ ක්‍රියාවලියට මේ දක්වා විවිධ පුද්ගලික  වාහන සමාගම් විසින් ඇමරිකානු ඩොලර් බිලියන 80 ක් පමණ ආයෝජනයක් කර තිබේ. සංසන්දනය කරන විට මෙම මුදල අප ශ්‍රී ලංකාවේ එක් වර්ෂයක මුලු ජාතික දල නිෂ්පාදනයට සමාන වේ.

ඇත්තෙන්ම මිට දශකයකට පමණ පෙර විද්‍යා කතාවල චරිතයන් වූ; බොහෝ කලකට පෙර අප නැරඹු නයිට් රයිඩර් අප මතකයට එයි. එහෙත් දැන් පෙනෙන විදිහට ඉතිර වසර කිහිපය තුල ඇමරිකාව වැනි බටහිර රටවල යතාර්ථයක් වීමෙහි කිසිම සැකයක් නැත්තේය. ටෙස්ලා BMW යනාදී සමාගම් 2021 වැනි මෑත අනාගතයේදී ස්වයං ධාවක  වාහන වෙළඳ පොලට දැමීමට බලාපොරොත්තු වෙති.

මෙයට හොදම උදාහරණ වශයෙන් ඇමරිකාවේ ෆෝඩ් කොම්පැනිය කෘතීම බුද්ධි (AI) ව්‍යාපාරයක ඩොලර් බිලියන 1 ක් යෙදවීමද උබර් සමාගම ස්වයං ධාවක  ට්‍රක් සමාගමක් මිලදී ගැනීමද සදහන් කල හැක. මේ සමාගම් සැලසුම් කරන්නේ ඒ අනාගතයේදී ඇතිවන වෙනස් වීමට මුහුණ දෙන්නටය.

මෙම ස්වයං ධාවක  වාහන මිනිස් සංහතියේ ජිවත්වන ආකාරය උඩු යටිකුරු කරන බවට සමත්වන බවට නම් කිසිම සැකයක් නැත්තේය. දැන් ශත වර්ෂයක පමණ කාලයක සිට බටහිර රටවලත් අවුරුදු 25 ක් පමණ අප රට වලත් අප ජිවන රටාවල් ගොඩ නැගී ඇත්තේ වාහන වටා වීම මෙයට හේතුවය.

ස්වයං ධාවක  වාහන වලින් මුලින් බටහිර සමාජයට සහ තරමක කාලයකට පසු අපට සිදුවිය හැකි වෙනස්කම් බොහෝය. එයින් ප්‍රධාන තැනක් ගන්නේ ඉන්ධන පාවිච්චිය සහ මාර්ග අනතුරුයි. අපි වාහන එලවන විට එක් එක් රියදුරාගේ ධාවන ශෛලිය අනුව ඉන්ධන දහනය වෙනස් වෙයි. ස්වයං ධාවක වාහන දුවන්නේ  මිනිසෙකුගේ අඩුපාඩුකම් කිසිත් නැති පරිඝනකයක් මගිනි. වාහනයේ සවිකර ඇති නොයෙකුත් උපකරණ මගින් ලබාදෙන මිනුම් අනුව පරිඝනකය වාහනය ධාවනය කරයි. ඒවා අප මෙන් නොව මිනිස් අඩුපාඩුකම්  ඇත්තේම නැත. ඒ නිසා මාර්ග අනතුරු සිදු වන්නේත් නැත. මාර්ග අනතුරු සිදු වන්නේ නැත්නම් වාහනය තුල සිටින මගීන් ආරක්ෂා කර ගැනීමට ආරක්ෂක පටි, එයාර් බෑග්ස් , ඇන්ටි ලොක් තිරිංග  යනාදිය වාහන වලට අවශ්‍ය වන්නේ නැත. විශාල ඉතිරියක් සිදු වේ, බරත් අඩුවේ.

මිනිසුන් ගෙන් ස්වයං ධාවක වෙතට මාරු වූ විට 80% ක පමණ ඉන්ධන පරිභෝජනයේ අඩුවීමක්   සිදුවිය හැකි බවට ගණන් බලා තිබේ. අප කොතරම් දුර්වල රියදුරන්දැයි මෙයින් සිතාගත හැක.

එහෙත් මෙයින් ඉන්ධන ඉතිරියක් සිදුවිය යුතු යයි කිව හැක්කේ  ස්වයං ධාවක වාහනද දුවන්නේ දැන් අපි දුවන කිලෝ මීටර ප්‍රමාණයම බව උපකල්පනය කලහොතිනි. නමුත් වාහනය ස්වයං ධාවක වන්නේ නම් මිනිසුන් වාහන කොතරම් කිලෝ මීටර  ප්‍රමාණයක් වැඩිපුර දුවනු ඇත්තේ දැයි සිතා ගන්නටත් අපහසුය. වාහනය ස්වයං ධාවක වන්නේ නම් ඉන්ධන පුච්චන්නේ දැන් ප්‍රමාණයෙන් 20%  ක් පමණ නම් මිනිසුන් ගමන් යාම බොහෝ වැඩි වනු ඇත. වියපත් මිනිසුන් , රෝගීන් , මහන්සි වූ අය, බීපු මිනිසුන්, එලවන්නට බැරි අය  කිසි බයක් නැතුව ගමන් යනු ඇත. ඇත්තෙන්ම සමහර විට ඉන්ධන පාවිච්චිය නොසිතු ලෙස වැඩි වන්නටත් ඉඩ තිබේ.

මෙම බොහෝ විට බටහිර රටවල වසර කිහිපයකින්  වෙන්නට යන අප රට වල දශක කිහිපයකින් සිදුවිය හැකි ජිවිත කළඹවන වෙනස් කමෙන් අප රටේ ආර්ථිකයටද ඉක්මන් බලපෑමක් ඇති විය හැකි විදිහක් තිබේ. ඒ මැද පෙරදිග රැකියාවන්ය. අපේ රටෙන් බොහෝ පිරිස් මැද පෙරදිග  රියදුරු රැකියාවන් වල දී සිටිති. බටහිර මෙම ස්වයං ධාවක වාහන පටන් ගන්නා විටම වාගේ මැද පෙරදිග පොහොසත් රටවල්, විශේෂයෙන්ම අප රට අය රියදුරු වැඩ කරන රටවල්ද , මෙම ක්‍රමයට යනු ඇත. විශේෂයෙන් ඒ රටවල සස්කෘතිය නිසා ඔවුන් මෙය ඉතා ඉක්මනින් කරනු ඇත, අප රටට එහි ඇති රියදුරු රැකියා අවස්ථා විශාල ලෙස අඩුවනු ඇත. මෙම වෙනස අපේ ආර්ථිකයටද විශාල ඍන බලපෑමක් කරනු ඇත.


ලංකාවේ ස්වයං ධාවක වාහන පාවිච්චිය කවදා සිදුවේ දැයි කියන්නට නුපුළුවන, ඒ ඒවාට අවශ්‍ය යටිතල පහසුකම් අපට ගොඩනංවන්නට බොහෝ මුදලක් යට කලයුතු නිසාය. ලංකාවේ ස්වයං ධාවක වාහන ගැන සිතන විටම මට සිහියට එන්නේ හෝමාගම දුම්රිය හරස් පාරත් එක්කම තිබෙන හන්දියයි.. එවැනි අවුල් ජාලයක් වූ හන්දියක් අසලට වත්  ස්වයං ධාවක වාහනයක් ගියහොත් එහි පරිගණකය නම් නැවත අලුත් වැඩියා කරන්නට නම් සිදුවනවා නොඅනුමානය.  

Friday, November 24, 2017

අපි කුණ්ඩසාලේ ප්‍රාදේශීය සභාව සඳහා චන්දය ඉල්ලීමට තීරණය කළෙමු.


Map of Kundasale


අපි, එක්සිත් ඇති පුරවැසියන් කණ්ඩායමක්, වර්තමානයේ අප රටේ ගොඩනැගී ඇති ඉතාමත් ජුගුප්සාජනක එමෙන්ම අකාර්යක්ෂම දේශපාලනයේ පැවැත්ම වෙනස් කර පුරවැසියා ගේ යහපත සහ ඔහුගේ දියුණුව කේන්ද්‍ර කරගත් පාලනයක් නිර්මාණය කිරීමට  සනිටුහන් කරගෙන මෙවර ප්‍රාදේශීය සභා චන්දයේදී එම අරමුණ කරා යාම ආරම්භ කිරීමට  තීරණය කළෙමු. අපි පහත ප්‍රතිපත්ති මාලාව ක්‍රියාත්මක කිරීම සඳහා ඔබ සියලු දෙනාගේ සහය මේ සඳහා කරුණාවෙන් ඉල්ලා සිටින්නෙමු. ඒ අතරම ඔබ සියලු දෙනාගෙන් අපගේ ප්‍රතිපත්ති තවත් වැඩි දියුණු කර ගැනීමට ලැබෙන යෝජනා ඉතා ඕනෑකමින් අධ්‍යයනය කර අවශ්‍ය තැන්හි අප ප්‍රතිපත්ති දියුණු කර ගන්නා බවද දන්වා සිටිමු.  
ප්‍රාදේශීය සභාවක මුලික කාර්ය භාරය වනුයේ එම ප්‍රාදේශීය සභා ප්‍රදේශය තුල සිටින ජනතාවගේ ඕනෑ එපාකම් ඉටුකර ප්‍රදේශයේ පරිපාලන කටයුතු නියමිත ආකාරයෙන් පවත්වා ගැනීමයි. අප විශ්වාශ කරන පරිදි මෙම කාර්යයන් අතර,
1.    බදු අය කිරීම සහ බදු  මුදල් ප්‍රයෝජනවත් ව්‍යාපෘතිවල කාර්යක්ෂම අයුරින් යෙදවීම.
2.    ගොඩනැගිලි සෑදීමේදී නියමිත ආකාරයට ඒවා සිදුවන බව නිශ්චය කිරීම.
3.    ප්‍රදේශයේ පරිසරය ජනතාවගේ සෞඛ්‍ය  ආරක්ෂා වන පරිදි තබා ගැනීම.
4.    ප්‍රදේශය තුල දරුවන්ගේ අධ්‍යාපනයට නියමිත පහසුකම් යනාදිය ලැබෙන බවට සහතික කිරීම.
5.    ප්‍රදේශයේ අපද්‍රව්‍ය පරිසර හානියක් නොවන පරිදි සෞඛයානුකුලව  ඉවත දැමීමට කටයුතු කිරීම.    
6.    ප්‍රදේශයේ මහා මාර්ග නියමිත ආකාරයෙන් පවත්වා ගැනීමට ඒ සදහා වගකීම් ඇති රාජ්‍ය ආයතන සමග කටයුතු කිරීම.
7.    ප්‍රදේශයේ පොදු ප්‍රවාහන පද්ධතිය නියමිත රජයේ සහ පෞද්ගලික ආයතන සමග එක්ව ජනතාවට උපරිම සේවයක් ලැබෙන අයුරින් කාර්යක්ෂම ලෙස සංවිධානය කිරීම.
8.    ප්‍රදේශයේ සංචාරක සිත්ගන්නා ස්ථාන දේශීය සහ විදේශීය සංචාරකයන්ට දැනගැනීමට හැකිවන පරිදි ප්‍රචාරණය කර ඒවා නැරඹීමට පැමිණෙන්නන්ට පසුකම් ඇති කිරීම.
9.    ප්‍රදේශයේ පුරන් වී යන කුඹුරු ගොවිතැන් කිරීමට ක්‍රමවේද යෙදවීම.
10.                       පුරවැසියන්ගේ විනෝදාස්වාදය, දැනුම දියුණු කිරීම සහ ක්‍රීඩා කටයුතු සදහා අවස්ථා ඇති කිරීම සහ ඒවා සංවිධාත්මකව වැඩි දියුණු කිරීම.
11.                       පුරවැසියන්ට ආයතනය සහ සම්බන්ධ වීමට, කරුණු ඉදිරිපත් කිරීමට, නව තාක්ෂනය ප්‍රයෝජනයට ගෙන පහසුකම් සැලසීම.
12.                       ප්‍රදේශයේ අපරාධ අවම කිරීමට පුරවැසියන් සහ අදාළ රාජ්‍ය ආයතන සම්බන්ධීකරණය කර ක්‍රමවේද ඇතිකිරීම.
13.                       ප්‍රදේශයේ තරුණ තරුණියන්ගේ විරැකියාව අවම කිරීමට හැකිතරම් නව අදහස් යොදවා ගෙන  කටයුතු කිරීම.
14.                       පුරවැසියන්ගේ මානසික සහ ශරීර සෞඛ්‍ය මනා ලෙස තබා ගැනීම සඳහා  තිබෙන සම්පත් වලින් ලබා දෙන සේවය වඩා  කාර්යක්ෂම කිරීම.
15.                       පුරවැසියන් ගේ අදහස් වලට  සංවර්ධන කටයුතු හා නව ව්‍යාපෘති වලදී මුල්තැන ලබා දීම.
16.                       බල ප්‍රදේශයේ පිළිසරණක් නොමැති වයස්ගත සහ අබාධිත  පුද්ගලයන් , කුඩා ළමුන් යනාදීන්ට ආරක්ෂාව සැලසීම. 

මේ කිසි වගකීමක් කිසිම  ප්‍රාදේශීය සභාවකින් හරියාකාරව  සිදු නොවනවා පමණක් නොව ඒ දිශාවට යාමට කිසියම් උනන්දුවක්  බවක් වත් නොමැති බවට  මේ රටේ ඕනෑම පුරවැසියෙකු සාක්ෂි දරනවා ඇත. ඒ නිසා මේ පිළිබඳව යමක් කලයුතු යයිද සැමදා දේශපාලකයන්ට බැන වැදීමෙන් පමණක්ම තිබෙන තත්වයන් වෙනස් කල නොහැකි යයිද සිතන එක් සිත් ඇති කණ්ඩායමක් වන අපි මෙවර කුණ්ඩසාලේ ප්‍රාදේශීය  සභාවට ස්වාධින කණ්ඩායමක් ලෙස තරඟ කරන්නට තීරණය කළෙමු. මෙලෙස තරඟ කරන්නේ කුණ්ඩසාලේ ප්‍රාදේශීය සභා ජයගෙන එහි ඇතිකරන වෙනස්කම් මඟින් රට පුරා දේශපාලනයෙහි වෙනසක් ඇතිකරන්නටය.

ඒ මඟින් මේ ජරා ජීරණය වූ දුෂණ සහ අකටයුතුතාවයන්ගෙන් පිරි ලාංකික දේශපාලනයෙහි යම් ධනාත්මක වෙනසක් ඇතිකිරීමටය. අපේ ප්‍රතිපත්ති, එසේත් නැත්නම් අප ජයගත් පසු පුරවැසියන්ට සේවය කරන ආකාරය පහත පරිදි වෙයි.
1.    ප්‍රාදේශීය සභාවේ අප කිසිම සාමාජිකයෙකු වැටුප් ලබා ගන්නේ නැත. සේවය සම්පුර්ණයෙන්ම ස්වෙච්චා සේවයක් වෙයි. යම් මන්ත්‍රීවරයෙකුට අවශ්‍ය නම් සහභාගිවන රැස්වීමකට රුපියල් 1000 ක දීමනාවක් ලබා ගත හැකිය. මෙයින් ඉතිරිවන මුදල් පසුව විස්තර කෙරෙන කොට්ටාශ තොරතුරු මධ්‍යස්ථාන ඇතිකිරීමට භාවිත කෙරේ.
2.    ගොඩනැගිලි අනුමැතියන් ඇතුළු ඕනෑම ප්‍රාදේශීය සභාවෙන්  කරගත යුතු කාර්යයකට අවශ්‍ය ලේඛන සියල්ලේම ලැයිස්තුවක්  ප්‍රාදේශීය සභා කාර්යාලයෙහි, උප කාර්යාලයන්හි, සියලුම ග්‍රාමසේවා කර්යාලයෙහිම යනාදී වශයෙන් සියලුම රජයේ කාර්යාලවල ප්‍රදර්ශනය කෙරේ. ඊට අමතරව ප්‍රාදේශීය සභා වෙබ් සයිට් එකේ සහ F B පිටුවේද ඒවා ඇතුලත් කරනු ඇත. මෙයින් පුරවැසියන් බොරුවට රස්තියාදු වීම වලක්වනු ඇත.
3.    ඉහත ඕනෑම කටයුත්තක් නියමිත ලේඛන සමග භාර දීමෙන් වැඩ කරන දින හතක ඇතුලත කර දෙනු ලැබේ. එසේ නොකෙරෙනු හොත් ඒ පිලිබදව සභාපතිවරයා මුණ ගැසී, ඊමේල් එකක් මගින්, F B පිටුවේ සටහන් කිරීමෙන් හෝ S M S මඟින්  දැන්විය හැක. ලේඛන නිසි අයුරින් තිබේ නම් දින තුනක් ඇතුලත කාර්ය ඉටු කරනු ලැබේ.
4.    ප්‍රාදේශීය සභා  සියලුම බදු, අනෙකුත් ගාස්තු යනාදී අය කිරීම් සහ ගාස්තුද ඉහත දෙකෙහි පරිදි පුරවැසියන්ට පරීක්ෂා කිරීමට ප්‍රදර්ශනය කරනු ලැබේ.
5.    සභාවේ ගෙවීම් කටයුතු ක්‍රෙඩිට් කාඩ් මඟින් කරන්නට පහසුකම් සැලසීම.
6.     සභාවේ  අය වැය වාර්තාවද  ඉහත ආකාරයෙන්ම වසරක් පාසා පුරවැසියන්ගේ දැනගැනීම සඳහා ප්‍රදර්ශනය කරනු ලැබේ.
7.     ප්‍රාදේශීය සභා  අරමුදල් යොදවා කරන්නට බලාපොරොත්තු වන ව්‍යාපෘති සෑම මන්ත්‍රී කොට්ටශයකටම හැකි තරම් සමාන වන අයුරින් බෙදා දෙනු ලැබේ.
8.    සැම මන්ත්‍රී  කොට්ටාශයකම ක්‍රියාත්මක  කිරීමට  යෝජනා කරන සියලුම ව්‍යාපෘති යෝජනා වලින් උපරිම  පුරවැසියන් පිරිසකට ප්‍රයෝජනයට ගත හැකි ව්‍යාපෘතීන් තෝරා ගැනීම සදහා කොට්ටාශයේ සියලුම චන්දදායකයන් එක්රැස් කර මාස හයකට  වරක් පවත්වන රැස්වීමකදී තීරණය කිරීම. මෙලෙස සේවය ලබන්නන් හා සාකච්චා කර තීරණය කිරීමෙන් වංචාකාරී ලෙස පුරවැසියනට අයත් සම්පත් පුද්ගලික වාසි වලට යොදා ගැනීම වැලැක්වීම මෙහි ප්‍රධාන අරමුනයි.
9.    මෙම සාකච්චා වලදීම කොට්ටාශයට බලපාන පහත විෂයයන්ද සාකච්චා කර  තීන්දු තීරණ ගනු ඇත.
·       ගොවිතැන
·       මාර්ග පද්ධතිය
·       කසල එකතුකිරිම
·       පරිසරය
·       අධ්‍යාපනය
·       වාරිමාර්ග  
10.                    සැම මන්ත්‍රී කොට්ටාශයකටම කුඩා තොරතුරු මධ්‍යස්ථානයක් ඇතිකිරීම. මේ මඟින් ප්‍රාදේශීය සභා වෙතට යොමුකල යුතු  සියලු අයදුම්පත්, කාර්යාලයට නොපැමිණ  ඉන්ටනෙට් මාර්ගයෙන් බාරදීමට පහසුකම් ඇති කිරීම.
11.                    කසල, පරිසරයට කිසිම හානියක් නොවන පරිදි පොහොර සහ බලය ජනනය කිරීමට පුද්ගලික අංශයෙත් සහය ලබාගෙන ක්‍රම වේදයක් ඇතිකිරීම
12.                    ප්‍රාදේශීය සභා  බල ප්‍රදේශය තුල ජිවත්වන තරුණ තරුණියන්ට රැකියා ලබාගැනීමට පුද්ගලික අංශයේ සහයත් ලබාගෙන රැකියා පුහුණු ආයතන කිහිපයක් ඇතිකර පුහුණුව ලබාදී රැකියා ලබා දීමට කටයුතු කිරීම.
13.                    ප්‍රදේශයේ සංචාරක සිත්ගන්නා ස්ථාන සඳහා සංවිධානාත්මක ප්‍රචාරයක් ලබාදී ඒවා නැරඹීමට පැමිනෙන්නන්ටද නිසි පහසුකම් ලබාදී ප්‍රාදේශීය සභා ප්‍රදේශයට පිටතින් ගලා එන ආදායම වැඩිකිරීම.

14.                    අපරාධ අඩු කිරීම සඳහා පොලිසියත් සමග එකතුව වැඩ පිළිවෙලක් සකස් කිරීම. මේ සඳහා නවතම තාක්ෂනය යොදා ගැනීම ප්‍රධාන වෙයි. මේ පිළිබඳව වැඩි විස්තර පහත මගේ බ්ලොග් ලියවිල්ලෙන් බලා ගත හැක. http://lakshmanillangakoon.blogspot.com/2017/11/blog-post_5.html
15. සෑම කොට්ටාශයකටම අඩු තරමින් මේස පන්දු, වොලී බෝල්, දාම්, කැරම් සහ බැඩ්මින්ටන් පහසුකම් සහිත ක්‍රීඩා සංකීර්ණයක් යම් රජයේ ආයතනයකට අනුබද්ධව ස්ථාපිත කිරීම.  

මේ සඳහා කුණ්ඩසාලේ ප්‍රාදේශීය ලේකම් කොට්ටාශයේ චන්දය ඉල්ලීම සඳහා අපේක්ෂකයන් 50ක් පමණ අවශ්‍යයය. එයට උනන්දුවක් දක්වන ඉහත ප්‍රතිපත්ති අඩු වැඩි වශයෙන් පිළිගත හැකි, චන්දය ඉල්ලීමට කැමති පුරවැසියන්ට පහත සඳහන් මාර්ග ඔස්සේ අප හා  සම්බන්ධ වන ලෙසට කරුණාවෙන් ඉල්ලා සිටිනු ලැබේ.

ලක්ෂ්මන් ඉලංගකෝන් - 081 425453
                                       070 2526565
                                       l.illangakoon@gmail.com
                                       1/38 සිරිමල්වත්ත , ගුන්නපාන ,                                           20270 


මා පිලිබඳ කෙටි විස්තරයක් දැනගැනීම පිණිස පහත පලකරමි.

රියර් අද්මිරාල් ලක්ෂ්මන් ටි බි ඉලංගකෝන්


මහනුවර ධර්මරාජ විද්‍යාලයේ විද්‍යා අංශයෙන් අධ්‍යාපනය ලැබූ මම ජයවර්ධනපුර විශ්ව විද්‍යාලයේ ව්‍යවාහාරික අධ්‍යාපන පිඨයට ඇතුළු වුනෙමි. විශ්ව විද්‍යාලයේ මල්ලව පොර කණ්ඩායමේද කැපී පෙනෙන ක්‍රීඩකයෙකු වූ මම 1980 වර්ෂයේ අධිකාරි ලත් නිලධාරියෙකු වශයෙන් නාවික හමුදාවට බැඳුනෙමි. නාවික හමුදාවේ අවුරුදු 33 ක් සේවය කර රියර් අද්මිරාල් වරයෙකු ලෙස නැගෙනහිර ආඥාපතිවරයා ලෙස කටයුතු කරමින් සිටියදී වයස 55 සපුරා විශ්‍රාම ලැබුවෙමි.

නාවික හමුදාවේ සේවය අතරතුර වෙනත් බොහෝ පදක්කම් සහ පළදනා අතර  සතුරා ඉදිරියේ දැක්වූ නිර්භීත බාවයට තෙවරක් ජනාධිපති වෙතින් රණශුර සම්මානයෙන් පුදනු ලැබුවෙමි. තවත් බොහෝ පළඳනා අතර විශිෂ්ට සේවා විභුෂනයද වෙයි. පහත රටවල විදේශ පුහුණුව ලැබූ අතර සුප්‍රසිද්ධ එක්සත් ජනපද යුධ විද්‍යාලයෙන් විශිෂ්ට ශ්‍රේණියේ උපාධියද ලැබුවෙමි.
·       
ඉන්දියාව - වසරක තාක්ෂණ පාඨමාලාව
·       එක්සත් ජනපදය - රහස් තොරතුරු පාඨමාලාව
·       ඉන්දියාව - වසරක නාවික ගමනාගමනය විශේෂඥ පාඨමාලාව
·       එක්සත් ජනපදය - මාණ්ඩලික පාඨමාලාව
·       පකිස්තානය - ජාතික ආරක්ෂාව පිළිබඳව ශාස්ත්‍රපති උපාධිය.
·       එක්සත් ජනපදය - ත්‍රස්තවාදය
·       ඉතාලිය - යුද මෙහෙයුම් නීති
·       කොතලාවල ජාතික ආරක්ෂක විශ්ව විද්‍යාලය - කළමනාකරණ ශාස්ත්‍රපති උපාධිය

නාවුක හමුදාවේ නොයෙකුත් නෞකා, කඳවුරු සහ බල ප්‍රදේශ වල අණදෙන නිලධාරි හා ප්‍රාදේශීය බලධාරියෙකු  වශයෙන්ද මුලස්ථානයේ අධ්‍යක්ෂක ජෙනරාල්  වරයෙකු වශයෙන්ද කටයුතු කර ඇති මට නාවික ඉංජිනේරු උපකරණයක් සඳහා ජාත්‍යන්තර පේටන්ට් බලපත්‍රයක්ද හිමිය.
මම ටෙනිස්, මේස පන්දු, පිස්තෝල වෙඩි තැබීම සහ  ස්කොෂ් යන  ක්‍රීඩාවන්හි නිරත වූ අතර බොහෝ තරඟ වලින් ජය ගෙන ඇත්තෙමි.
නොයෙකුත් පුවත්පත් හා සඟරා ලිපිවලට අමතරව  මම පහත සඳහන් පොත් ප්‍රකාශයට පත් කර ඇත්තෙමි.

·       නග්න හිරු- Isac Asimove ගේ Naked Sun නමැති කෘතියේ පරිවර්තනය. -  M D ගුණසේන
·       උම්මග්ග ජාතකය උපමා කතා  සරල බසින් - ස්ටම්ඵර්ඩ් ලේක්
·       ජනසාරි - මොෂින් හමීඩ් ගේ The Reluctant Fundamentalist හි පරිවර්තනය - දර්ශන පබ්ලිෂර්ස්
·       විශ්වයේ ආරම්භය අවසානය හා සියලු දෑ සඳහා න්‍යායක් - Stephen Hawking ගේ The Theory of everything හි පරිවර්තනය - දර්ශන
·       කන්දේ සිරවූ නාවිකයා - ස්වතන්ත්‍ර අයිතිහාසික නවකතාව - සරසවි
·       සතුරා මුහුදේදී මුලා කිරීම සහ තවත් නාවික කතා - නාවික හමුදාවේ නාවික අත්දැකීම් - දර්ශන
මම දැනට ඉලංගකෝන් ගේ විවරණයය (https://lakshmanillangakoon.blogspot.com/ ) නමින් බ්ලොග් අඩවියක් ද පවත්වා ගෙන යන අතර එය  මසකට සාමාන්‍යයෙන් 5000 ක පමණ කියවනු ලබයි.
මම පහත පොත් ලිය අවසන් කරමින් සිටින්නෙමි.
·       අර්ල් ස්ටැන්ලි ගාඩ්නර් ගේ The case of angry mourner හි සිංහල පරිවර්තනය
·       සරල බසින් මහාවංශය - ඉතිහාසය සඳහා සරල බසින් මහා වංශය


මගේ මව රජයේ ගුරුවරියක් වූ අතර පියාද රාජ්‍ය සේවකයකු විය. මම වසර හතරක් මහනුවර වැව රවුමේ  ගාඩ්න්ස් ටෙනිස් සමාජයේ සභාපතිවරයා ව සිටියෙමි. දැන් සිරිමල්වත්තේ ගොවිතැන් හා  උද්‍යාන කටයුතු කරමින් ජිවත් වෙමි.

මම රාජකීය ආසියාතික සංගමය, කැලණිය විශ්ව විද්‍යාල ඉතිහාස සංගමය, ධජ නිලධාරීන්ගේ සංගමය යනාදී සංගම් වලද සාමාජිකත්වය දරමි.
මම පසුගිය කාලයේ වැඩකටයුතු කිහිපයක් සඳහා ප්‍රාදේශීය සභා කාර්යාලයට ගියෙමි. එහිදී මට මුහුණ පාන්නට වූ කටුක අත්දැකීම් සහ මා දුටු දුෂණ සහ අකාර්යක්ෂකම් නිසා මට මෙලෙස දියුණු තාක්ෂණය යොදාගෙන කාර්යක්ෂම, සාධාරණ සහ දුෂණයෙන් තොර පරිපාලනයක් ඇති කිරීමේ උනන්දුව නිසාම මේ සඳහා ඉදිරිපත්වීමට සිත් පහල වූ බව දන්වා සිටිමි. 

Sunday, November 19, 2017

එළඹෙන පලාත්පාලන මැතිවරණය; ප්‍රධාන සාධකය කුමක් විය හැකිද ?



මේ දිනවල රටේ වැඩියෙන්ම කතා බහා වෙන්නේ එක්කෝ පලාත්පාලන චන්දය ගැනය, එසේත් නැත්නම් අර්ජුන ඇලෝෂියස්ගේ දුරකථන ඇමතුම් පිළිබදවය.

චන්ද කොහොමත් අපට විනෝදාස්වාදය ගෙන දෙන අංගයක් නිසා මට මෙවර  චන්දයෙන් කුමක් වෙන්නට ඉඩ තිබෙන්නේද යන බව ගැන පොඩි විශ්ලේෂණයක් ලියන්නට සිතුනි. විශේෂයෙන්ම මෙවර චන්දය පැවැත්වෙන ආකාරය වෙනස් කර ඇති නිසා මෙහි  සාමාන්‍ය චන්දයකට වඩා යම් විශේෂ සිත්ගන්නා සුළු බාවයක්ද ඇති බව මෙතනදී කිව යුතුය.

මේ චන්දයට දැන් පෙනෙන විදිහට මුහුණ දෙන ප්‍රධාන පක්ෂ තුනක් වෙයි. ඒ එක්සත් ජාතික පක්ෂය, ශ්‍රී ලංකා නිදහස් පක්ෂය සහ පොහොට්ටුව කණ්ඩායමයි. සාමාන්‍යයෙන් ලංකාවේ සිංහල බහුතරයක් සිටින පලාත්වල අනෙකුත් කුඩා පක්ෂද මෙම කණ්ඩායම් තුනට සම්බන්ධ වී චන්දය ඉල්ලන්නට ඉඩ තිබෙන අතර වතු දෙමල ජනතාව බහුතරයක් වන ප්‍රාදේශීය පලාත්වල පමණක් වතු පක්ෂ තනියම  බලය ලබා ගැනීම සදහා තරග කරනු ඇත. මේ අතර ජනතා විමුක්ති පෙරමුණ සෑම ප්‍රාදේශීය පළාතකම වාගේ කුඩා චන්ද ප්‍රමාණයක් ලබාගෙන සමහර ඒවාගේ කොට්ටාශයක් දෙකක් ලබා ගනු ඇත.

කලකට පසු නැවත කරලියට පැමිණෙන කොට්ටාශ ක්‍රමය නොපැමිණියේ නම් රටේ පවතින ජනමතය සැලකු විට  සාමාන්‍ය චන්ද කොට්ටාශයක චන්ද බෙදීයාම පහත ආකාරයට සිදුවිය හැකිව තිබුනේ යැයි මට සිතේ.
එක්සත් ජාතික පක්ෂය - 35 %
ශ්‍රී ලංකා නිදහස් පක්ෂය - 20%
පොහොට්ටුව - 35%
කුඩා පක්ෂ හා ස්වාධින කණ්ඩායම් -10%

මෙලෙස පොහොට්ටුවට මෛත්‍රී කණ්ඩායමට වඩා ලොකු ප්‍රතිශතයක් තිබුනේ එය UNP එකට විරුද්ධ ප්‍රධාන කණ්ඩායම නිසාය. මක්නිසාද ගම්වල SLFP සහ UNP එකතුවීම බොහෝදුරට UNP පාක්ෂිකයන් පිළිගෙන ඇතත් SLFP පාක්ෂිකයන් පිළිගෙන නැතිනිසා යයි මට සිතේ.

එහෙත් දැන් මෙම තත්වය කොට්ටාශ ක්‍රමය හදුන්වාදීම නිසා සම්පුර්ණයෙන්ම වෙනස් වීමට ඉඩ තිබේ. ඇත්තෙන්ම කොට්ටාශ ක්‍රමය ජනාධිපති සිරිසේනගේ සහ තවත් පැත්තකින් එක්සත් ජාතික පක්ෂයේ ගැලවුම්කාරයා බවට මෙවර බොහෝ විට පත්වන්නට ඉඩ ඇත්තේය.
 මනාප ක්‍රමයට වඩා කොට්ටාශ ක්‍රමයේ ලොකු වෙනසක් ඇත්තේය. ඒ කොට්ටාශය තුල චන්දය ඉල්ලන පුද්ගලයාද චන්දය ලබා ගැනීමේ ප්‍රධාන සාධකයක් වීමේ ඇති හැකියාවයි. 

පක්ෂයක් එතරම් චන්ද ආකර්ෂණය කර නොගත්තේ වුවද එහි අපේක්ෂකයා කොට්ටාශය තුල ජනප්‍රිය චන්දදායකයා ගරු කරන පුද්ගලයෙකු නම් එම පක්ෂයට වාසි ලැබිය හැක. අනෙක මැතිවරණ ආසන මට්ටමේදී පවා කුලබේදය අනුව චන්ද වැටෙන අපගේ වැනි රටක ගම මට්ටමට එන විට කුල, ආගම්, වැනි සාධකද චන්ද ප්‍රමාණයට ලොකු බලපෑමක් කරන්නට පුළුවන. ඒවාගේම අපේක්ෂකයාගේ සනුහරයද චන්ද ප්‍රතිශත වලට ලොකු බලපෑමක් කරන්නට හැකියාව ඇත. කිට්ටුවෙන් බැඳී ඇති නෑයන් පවුල් 20ක් පමණ ලොකු වෙනසක් කරන්නට පුළුවන.

එහෙයින් මෙවර චන්දයේදී අඩුවෙන් බලාපොරොත්තුව සිටි ශ්‍රී ලංකා නීදහස් පක්ෂ (මෛත්‍රී ) බොහෝ විට අනෙක් ප්‍රධාන කණ්ඩායම් දෙක හා සමානව කොට්ටාශ  ලබා ගැනීමට ඉඩ ප්‍රස්තාවක් දැන් ඇති වී තිබේ. එය යතාර්ථයක් වුවහොත්  වර්තමානයේ පාර්ලිමේන්තුව සැකසී ඇති ආකාරයෙන්ම අනාගතයේ ප්‍රාදේශීය සභාද සංයුක්ත වීමට බොහෝ ඉඩකඩ ඇත්තේය.


ඒ අනුව බලනවිට කොට්ටාශ ක්‍රමයෙන් වැඩියෙන්ම අවාසි වන්නේ පොහොට්ටු කණ්ඩායමට බව  පෙනේ. මක්නිසාද මනාප ක්‍රමය තිබ්බේ නම් අපේක්ෂක සාධකයේ බලපෑම බොහෝ අඩුවී රටේ තිබෙන සාමාන්‍ය ජන මතය පිළිඹිබු වන ප්‍රතිපලයක් එන්නට ඉඩ තිබුණු බැවිනි.  

Sunday, November 5, 2017

පොලිසියට තාක්ෂනය පෙනෙන්නේම නැද්ද ?






මෑත කාලයකදී  TV නිව්ස් වල  ආභරණ කඩයක් හෝ පෙට්‍රල් ෂෙඩ් එකක් ආයුධ සන්නද්ධ හොර කණ්ඩායම් විසින් මංකොල්ල කන අවස්තාවක් නොපෙන්නු දවසක් ඇත්තෙම නැති තරම්ය. ඊයේ පෙන්වන ලද ආභරණ කඩයේ මැදිවියේ  අයිතිකරු සහ  ඔහුගේ පහළොස් හැවිරිදි පුතා විසින් සොරුන් පලවා හැරීමට කරන ලද සටන ඇත්තෙන්ම චිත්‍ර පටයක වත් නොදකින අන්දමේ  වීර කමකි. එහෙත් අනික් පැත්තෙන් ජිවිත පරදුවට තබමින්  එවැනි වීරකම් කරන්නට අහින්සක  වයස්ගත ව්‍යාපාරිකයන් තල්ලු කරන්නේ කවුදැයි සොයා බැලීම  අපගේ යුතු කමකි.

එසේම එවැනි කනගාටුදායක සිදු වීම් වලක්වාගත හැකි ආකාර සාකච්චා කිරීමද අප යුතුකමකි.

සාමාන්‍යයෙන් පොලිස් ස්ථානයක බල ප්‍රදේශය තුල නගර  දෙකක් පමණ ඇත්තේය. උදාහරණයක් වශයෙන් මා දන්නා වත්තේගම පොලිස් ප්‍රදේශය තුල නගර වශයෙන් තිබෙන්නේ මැණික්හින්න, මඩවල  සහ වත්තේගමයි. සාමාන්‍යයෙන් අවිගත් සොරකම් වලට ලක්වන පෙට්‍රල් ෂෙඩ් සහ ආභරණ සාප්පු මෙම පොලිස් ප්‍රදේශයේ මෙම කුඩා නගර වලින් පිට ඇත්තේම නැති තරම්ය.

එසේ නම් පොලිස් ස්ථානය කල යුත්තේ කුමක්ද ? වෙන කිසිවක් නොව  එවැනි අපරාධයක් සිදුවන විට ප්‍රතික්‍රියා කිරීම සඳහා යම් වැඩපිළිවෙලක් ස්ථානගත කිරීමයි.
මේ සඳහා මුලික අවශ්‍යතාවයන් පහත පරිධිය;


  1. අපරාධය පටන් ගත්  විගස පොලිසිය දැනගැනීම
  2. එය වැලැක්වීම සඳහා එම අපරාධ කරුවන් දමනය කල හැකි තරමට සන්නද්ධ වූ පොලිස් කණ්ඩායමක් අපරාධය අවසන්වී සොරුන් පලා යාමට පෙර  එතනට යැවීමට ඇති හැකියාව.
1- වයි ෆයි නිසා දැන් ඕනෑම ස්ථාන දෙකක් හෝ සමුහයක් සන්නිවේදනය කිරීම සඳහා මුලිකව රුපියල් 3000ක් හා  මසකට රුපියල් 1000ක  පමණ වියදමකට  සම්බන්ධ කර ගත හැක. සොරෙකු පැමිණි බව දන ගත වහාම කකුලෙන් යමක් තදකිරීමෙන් එසේත් නැත්නම් වැරදි ලාච්චුවක් අරින්නට සැලැස්වීමෙන් මෙවැනි සම්බන්ධයක් හරහා පසුවෙන්ම පොලිසියට ක්ෂණිකව මේ පිළිබඳව දැන්විය හැක.
2- සන්නද්ධ පොලිස් නිලධාරින් දෙදෙනෙකු හෝ වැඩිදෙනෙකු මෝටර් බයිසිකලයක හෝ වාහනයක තබා තියන්නට පුළුවන.( මේ නිලධාරින් මේ වැඩයට  පමණක් නොව වෙනත් එම නගරය අවට අවශ්යතාවන්ටද යෙදවිය හැකි නිසා මෙහි තවත් ප්‍රයෝජන බොහෝය)

මේ සඳහා පොලිසියට අවශ්‍ය තරම් මෝටර් බයිසිකල් නැත්තේ නම් රජයට මුදලුත් නැත්නම් ඒවා මාසික කල් බදු ක්‍රමයට මිලදී ගෙන ආරක්ෂාව සැපයෙන , නගර වල සාප්පු වලින් කුඩා මාසික ගාස්තුවක් අයකර මිලදී ගෙන මාසික ගාස්තු ගෙවීම අවසන් වූ පසු අයකිරීම්  නවතා දැමිය හැක. බයිසිකල් දෙකකට ලක්ෂ 5ක් වියදම් වන්නේ නම් ව්‍යාපාර 50 ක් තිබෙන්නේ නම් එක ව්යාපාරිකයෙකුට වියදම් වන්නේ රුපිය 10000 කි. මෙයත් අවුරුද්දකින් ගෙවීමට පිළියෙළ කළහොත් එය මසකට රුපිය 1000 පමණ වනු ඇත.

පොලිසියේ නිලධාරින් ප්‍රමාණය 77000 කි , මෙයට අමතරව මේ දිනවල tv නිව්ස් බලන විට  STF එකත් දැන් වැඩ සොයමින් සිටින බවක් පෙනේ. ඒ නිසා මිනිස් බලයේ කිසිම අඩුපාඩුවක් තිබිය නොහැක, 

නොකරන්නේ ඇයි ?





Friday, November 3, 2017

සුභ සහ යස ගෙන් පසුව තවත් බොහෝ අරුමැති දෑ සිදුවිය.




මම දැනට බලා ඇති වඩාත්ම සිත් ගත්  නාට්‍ය සුභ සහ යසයි. මෙම නාට්‍යට පසුබිම් වූ සත්‍ය     සිද්ධිය සිදු වුයේ ක්‍රිස්තු වර්ෂ 120 දී පමණය. සුභ රජුටත් ඉන්පසු වැඩිකලක් රාජ්‍ය කරන්නට ලැබුනේ නැත. මේ ඒ විස්තරයයි.


චන්ද්‍ර මුඛ සිව  රජුගේ බාල සහෝදරයා වූ  යසලාලක තිස්ස, තිසා වැවේ ජල ක්‍රීඩා උත්සවයකදී රජු මරා, රජය ලබා ගත්තේය.

දත්ත නැමැති දොරටුපාලකයෙකුගේ පුතෙකු වූ සුභ නැමැති දොරටු පාලකයෙකු රජු හා පෙනුමෙන් බොහෝ සමාන විය. විහිලුවට කැමති වූ යසලාලක තිස්ස රජු ඉඳහිට එම දොරටු පාලකයාගේ නිල ඇඳුම් තමා ඇඳගෙන, දොරටුපාලකයාට තම ඇඳුම් අන්දවා සිංහාසනයේ හිදුවා රාජ්‍ය නිලධාරීන් රජුට ගෞරව කරන විට, ඔවුනට අවඥ්ඥා සහගත ලෙස සිනහවීමට පුරුදුව සිටියේය. එක් දිනෙක සුභ සිංහාසනයේ වාඩි වී සිටියදී යසලාලක තිස්ස දොරටුපාල ලෙස රඟපාමින් රාජ්‍ය නිලධාරීන් ඉඳිරියේ සිනහසුන විට, අවස්ථාව පාවිච්චි කර රජ වීමට කල්පනා කල  සුභ රාජපුරුෂයන්ට දොරටුපාල ලෙස ඇඳ පැළඳ  සිටි රජු මරා දැමීමට අණ කලේය. රජු මරා දැමුනු අතර සුභ රජවිය.[1]

අවුරුදු 6 ක් රාජ්‍ය කල සුභ සහෝදරයා මරා රජ වුවත් පින්කර ගත යුත්තේ යයි සිතා  පහත කර්මාන්ත කලේය.
 o   අභයගිරිය සහ මහා විහාරයේ සුභරාජ නැමැති කුටි පේලි.
 o   උරුවෙල වල්ලි විහාරය.
 o   අනුරාධපුරයට නැගෙනහිරින් ඊකඩවර විහාරය.
 o   මහවැලි ගඟේ මෝය කට අසල නන්දිගාමක විහාරය. 

මේ කාලයේ නැකැත් කියන්නෙකු,

“වසභ නැමැත්තෙකු ඉදිරියේදී ශ්‍රී ලංකාවේ රජු වන්නේය.“ යැයි අනාවැකියක් කී හෙයින් රජු වසභ නම් , නම් ඇති සියලු දෙනා මරා දමන්නට නියෝග කලේය. ලම්බකර්ණ කුලයට අයත් රජුගේ හමුදාපතිගේ නිවසේ වසභ නැමැති ඔහුගේ බෑණා සේවය කලේය. එක් දිනක උදයේ සෙන්පතියා

මේ වසභත් අප රජුට බාරදිය යුතුය

යැයි බිරිඳ සමග සාකච්ඡා කර වසභ සමග රාජය සේවයට ගියේය. ඔහුගේ බිරිඳ වසභ බේරා ගැනීමට සිතා  සෙනෙවියාගේ  බුලත් මල්ලට  හුනු  නොදමා දුන්නාය. රජ මාලිගයේ  දොරටුව අසලදී හුණු නැති බව දුටු සෙන්පතියා, හුණු ගෙන ඒමට වසභ ආපසු  නිවසට යැව්වේය. ඔහු නිවසට පැමිණි විට සෙන්පතියගේ බිරිඳ ඔහුට සියලු දේ පවසා කහවනු 1000 ක්ද දී පලායන ලෙසට උපදෙස් දුන්නාය.

 ඔහු වහා පලා  ගොස් මහා විහාරයට පැමිණ  එයින්ද උදව් ලැබ කැරැල්ලක් පටන් ගත්තේය. ඔහු ගමින් ගමට ගොස් අවසානයේ රුහුනේදී හමුදාවක් ගොඩනගා ගෙන අවුරුදු 2 කින් පසු ආපසු අනුරාධපුරයට පැමිණ  සුභරාජ යුද්ධයෙන් පරාජය කර රජවිය. ඔහුගේ මාමා වූ සෙන්පති, සටනේදී මියගිය අතර ඔටුනු පැලදීමෙන් පසුව වසභ රජ පෙරදී තමන්ගේ ජීවිතය බේරු  පොත්ත නම් වූ ඒ මාමාගේ බිරිඳ, මහරැජිනිය ලෙස පත්කර ගත්තේය.

වරෙක වසභ රජ අනාවැකි කියන්නෙකු ගෙන් ඔහු තව කොපමණ කාලයක් ජීවත් වන්නේදැයි ඇසූ විට, අනාවැකි කරුවා අවුරුදු 12 ක් බව පැවසුවේය. රජු මෙය රහසක්ව තබා ගන්නා ලෙස පවසා අනාවැකි කරුට කහවනු 1000 ක් දී, බොහෝ සංඝයා කැඳවා, ආයුෂ වැඩිකර ගැනීමට කලයුත්තේ කුමක්දැයි අසා සිටියේය.
ඉන්පසු සංඝයා ඔහුට මෙලෙස කිවූහ,

“ජල පෙරනයන්, නිවාස, ආරෝග්‍යශාලා දානය දීම, කඩාවැටුනු ගොඩනැගිලි අලුත්වැඩියා 
කිරීම; පංචශිලය ආරක්ෂා කිරිම සහ පොහොය දිනවල ආහාර නොගෙන සිටීම කල යුතුය.“
රජු එයට එකඟ වී ඒ අනුව ජීවත්විය. ඔහු පහත පින්කම්ද සිදු කලේය.
o   සෑම අවුරුදු 3 කටම වරක් ඔහු රටේ සිටින සෑම සියලුම සංඝයාට සිවුරු 3 ක් පරිත්‍යාග කලේය. ස්ථාන 32 ක කිරිබත් සහ පැණි බෙදා දුන් අතර, ස්ථාන 64 ක සංඝයාට නොයෙකුත් ත්‍යාග පිරිනැමීය.
o   ඔහු මිහින්තලයේ වෙහෙර, ථූපාරාමය, රුවන්වැලිසෑය සහ ශ්‍රී මහා බෝධිය අවට පහන් 1000 කින් ආලෝකමත් කලේය.
o   දිවයින පුරාම ගරා වැටී තිබූ පන්සල් අලුත්වැඩියා කිරීම.
o   මහවැලිගොට්ට යැයි විහාරයක් කරවීය.
o   මහගම අනුරාරාම නැමැති විහාරයක් කර, එයට කරීස 1008 ක ඉඩම් සහ හැලිගම නැමැති ගමද පූජා කලේය.
o   මුක්කලේ විහාරය සාදා අලිසාර නැමැති ඇලෙන් ජලය කොටසක් ලබා දීමට කටයුතු කලේය.
o   ගලන්බාතිත විහාරයට උපෝසත ශාලාවක් සහ ගඩොල් වලින් ආවරනයක් සාදා පහන් සදහා තෙල් ලබාදුනි. එම විහාරයටම කරීස 1000 ක ඉඩම් වගා කිරීමට ප්‍රමාණවත් වැවක් සාදා දුන්නේය.
o   තවත් විහාර කිහිපයකටම උපෝසත ශාලා සෑදවිය.
o   මහා විහාරයට කාමර පේලියක්ද සාදා දුන්නේය.
o   බුදු පිලිම හතරක්  ශ්‍රී මහා බෝධී උද්‍යානයේ සෑදුවේය.
o   කයන්ති, රාජුපල්ල, වහා, කොළඹගාමක, මහානික්කාවතී,  මහරමෙත්තී, කොහාල, කාලි, කම්බුති, කතමන්ගන සහ අග්ගිවද්දමානක යන වැව සහ ඇල සාදවා වගාව දියුනු කලේය
o    නගරය වටා තිබුනු ආරක්ෂක බැම්ම තවත් ඉහලට බඳවා නගරයේ ද්වාරය 4 අසල බලකොටු ප්‍රාකාර සහ මාලිගාව අසල උද්‍යානයක් සාදා එහි පොකුනක හංසයන් ඇති කලේය.
o   නගරය පුරා නාන තටාක ඇතිකර පොලව යටින් උමං සාදා ඒවාට ජලය ගෙනාවේය
o   ඔහුගේ රැජිනිය පොත්තාද විහාරයක් සහ ස්ථූපයක්  සෑදුවාය.
ඔහු ථූපාරාමයේ සෑදූ විහාරය පූජා කරන දින මහා උත්සවයක් පැවැත්වූයේය. එදින ඔහු භික්ෂූන් අතර නොයෙකුත් ආහාර වර්ග බෙදා දුන්නේය. ඔහු මෙසේ අවුරුදු 44 ක් රාජ්‍ය කලේය.




[1] ප්‍රවීන සහ සුප්‍රසිද්ධ නාට්‍ය කරු සයිමන් නවගත්තේගමගේ සුභ සහ යස නාට්‍ය ගොඩනංවන ලද්දේ මේ සිද්ධිය පසුබිම් කරගෙනය.

Tuesday, October 31, 2017

සයිටම් සටන ; ජයග්‍රාහකයෝ සහ පරාජිතයෝ



සයිටම් සටන යයි බොහෝ දෙන හඳුන්වන ඇත්තෙන්ම රජයේ නොවන වෛද්‍ය විද්‍යාල මෙරට ඇතිකිරීමට විරුද්ධ ව වෛද්‍ය වෘතිය සමිතිය ප්‍රධානකොට තවත් බොහෝ පරදු දරන්නන් විසින් කරගෙන ගිය ව්‍යාපාරයට  යම් දුරකට විසඳීමක් ඇතිවී ඇති සැටියක් පෙනේ. මෙම ව්‍යාපාරයට පසු කලෙක එක්වූ කණ්ඩායම් බොහොමයක් විරුද්ධ බව පෙනුනද ඔවුනට GMOA නොමැතිව මෙම විරෝධතාවය පවත්වා ගැනීමට නොහැකි වන්නේ පහත කරුණු නිසාය.

  • වෛද්‍ය වරුනට  හැර සම්බන්ධ වී සිටින කිසිම කණ්ඩායමකට ජනතාවට දැනෙන වර්ජනයක් කරගැනීමට නොහැකි වීම.
  • වෛද්‍ය සිසුන්ගේ සමිතිද තම ජෙෂ්ටයන් වන වෛද්‍යවරුන්ට කන්දීම
  • වෛද්‍ය වරුන් සටනින් ඉවත් වූ විට මාධ්‍යයේ අවධානයද නැතිවීම
  • අන්තරය ඕනෑවට  වඩා කෑ ගසා ජනතාව ඉදිරියේ  ඔවුන්ගේ දේශපාලන ප්‍රාග්ධනය අවසන් කරගෙන සිටීම 
එහෙයින් මෙම සංකීර්ණ ප්‍රශ්නය විසඳීමට අඩි තාලම වැටි ඇතැයි පෙනේ.

දැන් අපි මෙම විසඳුම අවසාන විසඳුම වුවහොත් මෙම සටනේ සිටි නොයෙකුත් පරදු දරන්නන් අතර ජයග්‍රාහකයන් සහ පරාජිතයන් කවුදැයි බලමු.
ජයග්‍රාහකයන් -  

1. GMOA - ඔවුනට අවශ්‍යතාවය තිබුනේ සීමාසහිත රජයේ විශ්ව විද්‍යාල වලින් හැරෙන්නට පිටස්තර වෛද්‍ය විද්‍යාල වලින් වෛද්‍යවරුන් සෑදී ඔවුනට ඇතිවන තරඟය මඟහරිමටය. එය එසේම සිදුවිය. දැන් සයිටම් ආයතනය යම් අයුරකින් ලාභ නොලබන ආයතනයක් බවට පත් කලවිට අනාගතයේ කිසිම් ව්‍යාපාරිකයෙකු ලංකාවේ වෛද්‍ය විද්‍යාලයක් පටන් ගැන්මට සිතන්නට වත් හේතුවක්  නොමැත.
2.  ලංකාවේ සිසුන් අධ්‍යාපනය සඳහා යන රටවල පෞද්ගලික විශ්ව විද්‍යාල 
3. ඒවායේ මෙරට ඒජන්ත වරුන්
4. රජය - ලොකු හිසේ අමාරුවක් අවසන් වීම 
5. අන්තරේ සමහර නායකයන් - ඔවුන් ප්‍රිය කරන මාධ්‍ය ප්‍රසිද්ධිය මොහොතකට හෝ ඔවුන් වෙතට වැටීම.
6. අලුත්  වෛද්‍ය සභාව - ප්‍රධාන වශයෙන් ඔවුන්ගේ පුර්වකයන්ගේ අතපසුවීම් සහ දැකීමක් නොමැති වීම  නිසා ඔඩු ගොස් තිබූ මෙම ප්‍රශ්නය ඔවුන් ආ  විගස විසදාගන්නට හැකි වීම.  


පරාජිතයන් 
1. ජනතා විමුක්ති පෙරමුණ - ඉතිහාසයේ බොහෝ තැන්වල මෙන් ඔවුන් මෙවරත් වැරදි අශ්වයාට උදව් කළේය. අවසානයේ කෘතගුණ ලැබුනේ ප්‍රසිද්ධ අපහාසයකිනි.
2. අන්තරය - වැඩක් නැති බොරුවක් පසුපස ගොස් ජනතාව ඉදිරියේ තමන්ගේ යන්තම් හෝ තිබූ දේශපාලන ප්‍රාග්ධනය බරපතල ලෙස ජනතාව ඉදිරියේ ක්ෂය කර ගත්තේය
3. සාමාන්‍ය ජනතාව- 
(a ) අනාගතයේ රජයේ නොවන විශ්ව විද්‍යාල ඇතිවීම මේ විසඳුමෙන් කෙලින්ම නැවත්වෙන  බැවින්  රටේ බලවත් අවශ්‍යතාවයක් වන සෞඛ්‍ය  ක්ෂේත්‍රයේ වෛද්‍ය වරුන් තමන්ට වියදමක් නැතිව නිපදවා ගන්නට  තිබූ අවස්ථාව දැන් සයිටම් පමණකින් සැහීමකට පත්වන්නට සිදුවීම. 
(b) පිටරට  පෞද්ගලික වෛද්‍ය විද්‍යාල ඇදී  යන බිලියන ගණනක විදේශ විනිමය මෙරට රඳවා ගැනීමට තිබූ  අවස්ථාව නැති වීම.
(c) වෛද්‍ය අධ්‍යාපනය සඳහා පිටරට සිසුන් මෙරටට ගෙන්වා ගැනීමෙන් ලබා ගැනීමට තිබූ විශාල විදේශ විනිමය ප්‍රමාණයක් නැතිවීම. 
4. රජය - ඉහත ජනතාවට බලපාන හේතු සහ ජනතාව විසින් පත්කළ රජයක් වශයෙන් ජනතාවට හිතකර ප්‍රතිපත්ති ක්‍රියාවේ දීමට නොහැකියාව ප්‍රදර්ශනය වීම 
5. දාර වාමාංශිකයන් - සිසුන් කිහිප දෙනෙකු ගේ ජිවිත පරිත්‍යාග කර විදි සටන් කිරීමට තිබූ අවස්ථාව නැතිවීම 
6. විපක්ෂ කණ්ඩායම් - රජයේ කකුලේ තිබූ නිතර රිදුම් දෙන  කට්ටක් ඉවත්වීම 
7 . වෛද්‍ය නෙවිල් ප්‍රනාන්දු - ලංකාවේ බොහෝ ව්‍යාපාරිකයන් බෝට්ටු රිටකින්  වත් අල්ලනු බිය වන ව්‍යාපාරයකට එඩිතරව  අත ගැසුවත් අවසානයේ එයින් ඉවත්වීමට සිදුවීම 
8. සයිටම් දෙමව්පිය සංගමයේ කොටස් -  අවසාන මොහොතේ මැදට පැන තම දරුවන්ටත් නිකං ඉතිරි ටික ඉගනගන්නට පුළුවන් දැයි බැලූවත් හරිගියේ නැත   

සමහර පරදු දරන්නන් කණ්ඩායම් දෙකේම සිටීම තරමක් අවුල් සහගත වුවත් ඔවුන්ට පරාජයන් සහ ජයග්‍රහණයන් දෙකම ලැබීම නිසා එසේ කරන්නට සිදුවිය.

වර්ජන වලට මුහුණ දිය යුත්තේ කෙසේද ? සරල උපදෙස් කිහිපයක්

ලංකාවේ තරම් වර්ජන ලෝකයේ කිසිම රටක ඇත්තේ නැත, ඉන්දියාවේ සමහරවිට ප්‍රාදේශීය මට්ටමෙන් තිබෙන්නට පුළුවන, එහෙත් ජාතික වශයෙන් නම් මේ වගේ විහ...