සුදු වහලීය

 මම මේ දිනවල  නැපෝලියන් යටත් වූ ඉංග්‍රීසි ජාතික  අද්මිරල් මේට්ලන්ඩ් ගේ ඒ පිළිබඳ පොත කියවමින් සිටිමි. 

ඔහු වරක් constantinople නගරයේ දී දුටු වහල් වෙළඳපොළක් පිළිබඳ විස්තරය  ඉතාම රසවත් වූ නිසා පරිවර්තනය කරන්නට සිතුණි. 

"1829 ඔක්තෝබර් 12- අප වරායෙන් පිටතට පැමිණ අසල තිබූ වහල්  වෙළඳපොළට පැමිණියෙමු. එය කුඩා චතුරස්‍රයක තිබුණු අතර චතුරස්‍රය මැද තරමක නිවාස කිහිපයක් විය. චතුරස්‍රයේ කෙළවර දෙකේ ම ඔවුන් විකිණීමට අවස්ථාව එනතුරු වහලුන් තබා ගැනීමට කුඩා කාමර කිහිපයක් විය. 

මේ කාමරවල ඉදිරිපස තිබූ ලී වේදිකා මත කළු ජාතික කාන්තාවන් සහ ගැහැණු ළමයින් කිහිප දෙනෙකු මම දුටුවෙමි. සුදු ජාතික පිරිසක් කාමර ඇතුලේ සිටියහ. 

වේදිකා දෙක මැද තිබූ ඉඩ වහලුන් මිලදී ගන්නට පැමිණි  තැනැත්තන් සඳහා වෙන්කර තිබිණ. 

චතුරස්‍රයේ තවත් කෙළවරක කලූ ජාතික පිරිමින් සහ ළමයි කණ්ඩායමක් පැනයාම වැළැක්වීමට කකුල් වලට මාංචු දමා සිටියහ. ඔවුන් අසල වැදගත් පෙනුමක් තිබූ සුදු ජාතිකයකු පයිප්පයක් උරමින් පුටුවක ඉඳගෙන සිටියේය. ඔහුගේ විස්තර අපට දැනගැනීමට නොලැබුණු නමුදු ජෝර්ජියානුවකු වන ඔහුගේ අයිතිකරු මිය ගිය නිසා ඔහු විකිණීම සඳහා ඉදිරිපත් කර ඇති බව පමණක් දැනගන්නට ලැබුණි.

නමයට පමණ  වෙළඳපොලේ ප්‍රධානියා පැමිණි අතර එහි කටයුතු පටන් ගැනුණි. මුලින්ම කළු ජාතික තරුණ කාන්තාවන් දෙදෙනෙකු  විකිණීම සඳහා ඉදිරිපත් කරන ලද අතර ශබ්ද නගන්නකු ඔවුන් රැගෙන ලන්සු කෑගසමින් වෙළඳපොළ තුළ ගමන් කළේය. යම් ගැනුම්කරුවකු ඔහුගේ මුදල කෑගැසූ පසු වෙළෙන්දා ද එම  ලන්සුව ගැනුම්කරුවන්ට කෑ ගසා කියන අතර  වෙනත් කෙනෙකු  ඊට ඉහළ ගණනක් ඉදිරිපත් කරන තුරු එසේ සිදුවෙයි. 

කෑ ගසන්නන් කිහිප දෙනෙකු මෙම කාර්යයෙහි යෙදුන අතර ඒ සෑම කෙනෙකු පසුපසම වහලෙකු ගමන් කළේය. 

අවසානයේ වයස දාසයක පමණ රූමත් සුදු තරුණියක් විකිණීම සඳහා ඉදිරිපත් කෙරුණි.

ඇය කුමන මිලකට ඉල්ලීම් ලැබුවාදැයි මම මුලින් නොදැක්කේ අප සිටින පැත්තට ම ඇය පැමිණියේ ටික වේලාවකට පසුව නිසාය. 

lambrino නමැති අපගේ පරිවර්තකයා ඇය ඉදිරියෙන් යන කෑගසන්නාගෙන් ම ඇයට දැනට මිල වී ඇති ගණන කීයදැයි ඇසුවේය. පියස්ට්‍රේස් 1200 ක් බව ඔහු කීවේය. 

මෙයින් කෝපයට පත් වූ තරුණිය  "බල්ලෙක් වැනි මුහුණක් ඇති ඔබට ැති ප්‍රයෝජනය කුමක්ද" යනුවෙන් අපගේ පරිවර්තකයාගෙන් ඇසුවේය. ඔහුට ඇත්තෙන්ම එවැනි මුහුණක් තිබුණ නිසා එතන සිටි පිරිස අතර සිනහවක් පැතිර ගියේය. නමුත් ඇය රැගෙන ගිය වෙළෙන්දා ඇයගේ ඉක්මන් කෝපය පෙන්වීම පිළිබඳව කෝපයට පත්ව  ඇයට බිය වැදුණේ, එයින් ඇගේ මිල පහත වැටෙන බව සිතූ නිසාය.

ටික දුරකින් හාන්සි පුටුවකට වී දුම් පයිප් එකක් උරමින් සිටි වයස හතලිහක පමණ තුර්කි ජාතිකයෙකු ඔවුන් කැඳවා ගෙන ඇය පරීක්ෂා කළේය. 

මුලින්ම ඇගේ අතින් අල්ලාගෙන උරහිස තෙක් පරීක්ෂා කළ ඔහු  පසුව ඇය කිට්ටුවට කර ඇයගේ ගවුම ඉදිරියෙන් විවෘත කර ඇයගේ පපු ප්‍රදේශය පරීක්ෂා කළේය. මේ පරීක්ෂා කිරීම පිළිබඳව තරමක් කලකිරීමකින් මෙන්  සිටි තරුණියට, ඔහු පියස්ට්‍රේස් 1300 කට ඇය ඉල්ලූ විට නැවත ත් එම කලකිරීම නැති වූ බව පෙනුණි. ඔහු ඇයගේ මුහුණ වසා තිබූ දුහුල් රෙද්ද ඉවත් කර න්න ඇයගේ මුහුණත් සහ දත් ද  පරීක්ෂා කළේය.

මෙලෙස අශ්වයන් මෙන් ම මිනිසුන් විකිණීම බලා සිටීමට නොහැකි නිසා අපි එතනින් ඉවත් වූයෙමු."